Məktəbdə münaqişələr: niyə yaranır və direktor onları necə idarə etməlidir ? Məktəb situasiyaları

"Məktəbdə münaqişələr və onların həlli yolları" kitabımdan.

Elşən Qafarov -Məktəbşünas

 Məktəbdə münaqişələrin idarə olunması direktorun ən çətin və məsuliyyətli vəzifələrindən biridir. Məktəb həyatında dörd əsas tərəf iştirak edir: şagird, müəllim, valideyn və məktəb rəhbərliyi. Bu tərəflər hər gün bir-biri ilə ünsiyyətdə olur və bu ünsiyyət zamanı müxtəlif səviyyəli fikir ayrılıqları yaranır. Fikir ayrılıqlarının bir hissəsi tez həll olunur, digər hissəsi isə vaxtında diqqət yetirilmədikdə açıq münaqişəyə çevrilir. Bu münaqişələr arasında direktor üçün ən çətin idarə olunanı müəllimlər arasında yaranan münaqişələrdir. Bunun səbəbi müəllimin məktəbdəki rolu ilə bağlıdır. Müəllim sinifdə müstəqil qərar verir, şagirdləri arxasınca aparır və kollektivin fikrinə təsir göstərə bilir. Ona görə müəllimlər arasındakı münaqişələr şagirdlər arasındakı mübahisələrdən daha mürəkkəb olur, daha uzun çəkir və səbəbləri daha dərində olur. Müəllimlə rəhbərlik arasında yaranan münaqişələr isə ayrıca diqqət tələb edir. Müəllim ilə metodbirləşmə rəhbəri, müəllim ilə direktor müavini və ya müəllim ilə direktor arasındakı münaqişələrin öz xüsusiyyətləri var. Bu münaqişələrin mərkəzində çox vaxt qərar vermə səlahiyyəti və bu qərarların müəllimin işinə təsiri dayanır.