ADU-da Elmi Şura iclası keçirilib

Azərbaycan Dillər Universitetində (ADU) 2024–2025-ci tədris ilinin ilk Elmi şura iclası təşkil olunub.

Direktor.az xəbər verir ki, tədbir 27 Sentyabr – Anım Günü ərəfəsinə təsadüf etdiyindən, ilk olaraq ölkəmizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi bir dəqiqəlik sükutla anılıb.

İclası açan universitetin rektoru, akademik Kamal Abdulla gündəlikdə duran əsas məsələləri diqqətə çatdırıb. Tədbirdə əlamətdar yubileylər də unudulmayıb: professor Əsgər Zeynalov 75, İngilis dilinin qrammatikası kafedrasının müdiri, dosent Leyla Xanbutayeva 60 illik yubileyləri, bədii rəhbər Yaqub Cavadov isə 40 illik səmərəli əmək fəaliyyəti münasibətilə təbrik edilib, onlara xoş arzular çatdırılıb.

Hesabat xarakterli çıxışında rektor ötən tədris ilində əldə olunan mühüm nailiyyətlərə toxunub. Bildirilib ki, beynəlxalq əlaqələrin gücləndirilməsi və tədrisin keyfiyyətinin artırılması nəticəsində ADU nüfuzlu QS reytinqində böyük sıçrayış edərək 1600 ali məktəb arasında 150-ci pilləyə yüksəlib. Bu dinamika abituriyentlərin marağına da birbaşa təsir göstərib — ali məktəbin tarixində ilk dəfə olaraq tələbə qəbulu planı 100 faiz yerinə yetirilib.

Maddi-texniki bazanın yenilənməsi çərçivəsində ADU-nun 2 və 3 saylı tədris korpuslarında əsaslı işlər görülüb və 10 yeni auditoriya müəllim-tələbə heyətinin istifadəsinə verilib. Eyni zamanda, tələbələrin media sahəsində praktik vərdişlərə yiyələnməsi və çoxdilli informasiya mühitinin formalaşdırılması məqsədilə "ADU Radio" fəaliyyətə başlayıb.

Yeni dönəmdə tədqiqat işlərinin genişləndirilməsi və akademik mühitin zənginləşdirilməsinin prioritet olduğunu deyən Kamal Abdullanın ardınca prorektorlar və professor-müəllim heyəti — Həmidə Əliyeva, Şəfəq Şahməmmədova, Sevdagül Əliyeva və Misgər Məmmədov çıxış edərək tədrisin təşkili, qarşıda duran vəzifələr və yeni layihələr barədə fikirlərini bölüşüblər.

İclasda həmçinin filologiya üzrə fəlsəfə doktoru Fialə Abdullayevanın təqdimatında görkəmli yazıçı və ədəbiyyatşünas alim Mir Cəlal Paşayevin xatirəsinə həsr olunmuş yeni nəşr ictimaiyyətə çatdırılıb. Ədibin hekayələrinin müxtəlif xarici dillərə tərcüməsindən ibarət olan toplunun Azərbaycan ədəbi irsinin dünyada tanıdılmasına və beynəlxalq mədəni körpülərin qurulmasına mühüm töhfə verəcəyi vurğulanıb.

Toplantı dissertasiya mövzularının müzakirəsi və elmi işlərin çapa tövsiyə edilməsi ilə yekunlaşıb.