ADU rektoru Anadolu Məktəbinin yazar və oxucuları ilə görüşüb

Azərbaycan Dillər Universitetinin rektoru Kamal Abdulla Bakıda Yunus Emre İnstitutunun Türk Mədəniyyət Mərkəzində Anadolu Məktəbi layihəsi çərçivəsində keçirilən yazar və oxucu görüşündə iştirak edib.

Direktor.az xəbər verir ki, bu barədə universitetdən bildirilib. Tədbirdə Türkiyə və Azərbaycanın ədəbiyyat və mədəniyyət nümayəndələri, millət vəkilləri, təhsil işçiləri və gənc oxucular bir araya gəlib.

Akademik Kamal Abdulla çıxışında yaradıcılığı və ədəbi fəaliyyəti barədə məlumat verib. O, “Yarımçıq əlyazma” romanı, “Gizli Dədə Qorqud” əsəri, Rafiq Əliyevlə həmmüəllifi olduğu “Kitabi-Dədə Qorqud və qeyri-səlis məntiq” və “Qeyri-səlis məntiq və dil-nitq” kitabları haqqında danışıb.

Tədbirdə Anadolu Məktəbi Vəqfinin Müvəkkillər Heyətinin üzvü Muhammed Hakan Tanrıöver, Türkiyənin Bakıdakı səfirliyinin Mətbuat müşaviri, doktor Alptekin Cihangir İşbilir, yazıçı və tərcüməçi İmdat Avşar, həmçinin digər qonaqlar iştirak ediblər.

Görüş çərçivəsində yazarlarla oxucular arasında fikir mübadiləsi aparılıb, gənclər oxuduqları əsərlərin müəlliflərini yaxından tanımaq, onları maraqlandıran suallara cavab almaq və ədəbiyyatla bağlı düşüncələrini bölüşmək imkanı əldə ediblər.

Yunus Emre İnstitutunun Bakıdakı koordinatoru Gökhan Seyhan çıxış edərək Anadolu Məktəbi layihəsinin əhəmiyyətindən danışıb. O, gənclərin eyni əsərləri oxumasının və həmin əsərlər ətrafında fikir mübadiləsi aparmasının onların dünyagörüşünün genişlənməsinə və qarşılıqlı anlaşma mədəniyyətinin formalaşmasına töhfə verdiyini bildirib.