Azərbaycan Universiteti ilə Pakistan ali təhsil müəssisəsi arasında tərəfdaşlıq

Azərbaycan Universiteti beynəlxalq əlaqələr şəbəkəsini genişləndirərək Pakistanın tanınmış ali təhsil ocaqlarından olan Northern Universiteti ilə strateji tərəfdaşlıq sazişi bağlayıb.

Direktor.az xəbər verir ki, bu barədə universitetdən bildirilib. Əməkdaşlıq memorandumunu Azərbaycan Universitetinin rektoru Səadət Əliyeva və Northern Universitetinin prezidenti Taha Jamil Sawar imzalayıb. Görüşdə iki təhsil ocağı arasında elmi və institusional inteqrasiyanın dərinləşdirilməsi, müştərək fəaliyyət planlarının reallaşdırılması və gələcək hədəflər ətrafında geniş müzakirələr aparılıb.

Rektor Səadət Əliyeva rəhbərlik etdiyi universitetin qlobal reytinqlərdəki nailiyyətləri, beynəlxalq standartlara uyğun akkreditasiya olunmuş tədris proqramları və təhsilin keyfiyyətinin yüksəldilməsinə xidmət edən strateji baxışı barədə ətraflı bəhs edib. Xarici tərəfdaşlarla qurulan əlaqələrin universitetin inkişaf kursunda xüsusi çəkiyə malik olduğunu vurğulayan rektor, bu cür təşəbbüslərin davamlı olacağını qeyd edib.

Öz növbəsində Northern Universitetinin prezidenti Taha Jamil Sawar təmsil etdiyi qurumun strukturu və Pakistandakı ali təhsil mühiti haqqında danışıb. Hazırkı dövrdə əmək bazarının tələblərinə uyğun olaraq İT, kibertəhlükəsizlik, süni intellekt və tibb kimi sahələrin böyük vüsət aldığını vurğulayan qonaq, Bakıdakı görüşdən məmnunluğunu və qurulan tərəfdaşlığın hər iki tərəf üçün səmərəli nəticələr verəcəyinə inamını dilə gətirib.

Görüşdə həmçinin Azərbaycan Universitetinin elmi işlər üzrə prorektoru Yusif Qasımov, rektorun müşaviri və Beynəlxalq Magistratura və Doktorantura Mərkəzinin rəhbəri Nüşabə Quliyeva, eləcə də Beynəlxalq əlaqələr şöbəsinin müdiri Elmira İsmayılova iştirak ediblər.

Bağlanan razılaşma tələbə və akademik heyətin qarşılıqlı mobilliyini asanlaşdırmağı, müştərək elmi araşdırmalar və konfranslar təşkil etməyi, həmçinin iki ölkə arasında təhsil inteqrasiyasını yeni mərhələyə daşımağı hədəfləyir.