BDU-da elmi seminar keçirilib

Bakı Dövlət Universitetində fizika sahəsində elmi müzakirə baş tutub.

Direktor.az xəbər verir ki, universitetin Fizika fakültəsinin Bərk cisimlər fizikası və Yarımkeçiricilər fizikası kafedraları, habelə Fizika Problemləri Elmi-Tədqiqat İnstitutunun Kondensə olunmuş hal fizikası şöbəsinin əməkdaşlarının iştirakı ilə birgə elmi seminar təşkil edilib.

Toplantıda Bərk cisimlər fizikası kafedrasının doktorantı Rağib Yavər oğlu Dəmirovun fizika üzrə fəlsəfə doktoru elmi dərəcəsi almaq üçün hazırladığı dissertasiya işinin ilkin müzakirəsi aparılıb. Tədqiqat işi 2211.01 – “Bərk cisimlər fizikası” ixtisası üzrə “Yarımmaqnit yarımkeçiricilərdə ölçü effektləri” mövzusuna həsr olunub.

Seminara sədrlik edən Yarımkeçiricilər fizikası kafedrasının müdiri professor Vaqif Salmanov tədbiri açıq elan edərək dissertantın elmi fəaliyyəti və təqdim olunan mövzunun əhəmiyyəti barədə məlumat verib. Daha sonra iddiaçı Rağib Dəmirov geniş təqdimatla çıxış edərək araşdırmanın aktuallığı, qarşıya qoyulan məqsədlər, istifadə olunan tədqiqat üsulları və qazanılan başlıca elmi nəticələri auditoriyanın diqqətinə çatdırıb.

Mövzu üzrə rəyçilər — fizika üzrə elmlər doktoru Adil Abdullayev və fizika-riyaziyyat elmləri doktoru Fərhad Rüstəmov çıxış edərək işin praktiki dəyəri, nəticələrin etibarlılığı və mövzunun müasir elmi tələblərə uyğunluğu barədə müsbət fikirlərini bölüşüblər, eyni zamanda müəyyən tövsiyə və qeydlərini diqqətə çatdırıblar. İddiaçı bildirilən mülahizələrə aydınlıq gətirib, seminar iştirakçılarının suallarını ətraflı cavablandırıb.

Müzakirələrin yekununda keçirilən açıq səsvermədə dissertasiya işi yekdilliklə bəyənilib. İclas iştirakçılarının yekun rəyinə əsasən, Rağib Dəmirovun araşdırmasının Azərbaycan Respublikasının Prezidenti yanında Ali Attestasiya Komissiyasının müvafiq tələblərinə tam cavab verdiyi vurğulanıb və dissertasiyanın növbəti mərhələdə Müdafiə Şurasına təqdim olunması tövsiyə edilib.