DİM Kembric TKT imtahanı təşkil edir

Dövlət İmtahan Mərkəzi 28 noyabr 2026-cı il tarixində Naxçıvan şəhərində TKT (Teaching Knowledge Test) imtahanı keçirəcək. İmtahan DİM-in Naxçıvan MR Regional Bölməsində (Naxçıvan şəhəri, Atatürk küçəsi, 3) təşkil olunacaq.

Direktor.az xəbər verir ki, bu barədə DİM məlumat yayıb. Belə ki, imtahana son qeydiyyat tarixi 13 oktyabr 2026-cı ildir.

Kembric Universiteti Nəşriyyat və Qiymətləndirmə qurumunun rəsmi test mərkəzi olan Dövlət İmtahan Mərkəzi ingilis dili müəllimləri üçün bilik və bacarıqları beynəlxalq səviyyədə təsdiq edən TKT (Teaching Knowledge Test) kvalifikasiyasının aşağıdakı modulları üzrə imtahan təşkil edir:

TKT Modul 1

TKT Modul 2

TKT Modul 3

TKT Modul YL (Young Learners – azyaşlı öyrənənlərə dilin tədrisi)

TKT Modul CLIL (Content and Language Integrated Learning – dilin məzmunla inteqrativ tədrisi)

Qeyd edək ki, DİM Kembric Universiteti Nəşriyyat və Qiymətləndirmə qurumunun rəsmi test mərkəzlərindən biri olaraq Kembric İngilis dili üzrə Qiymətləndirmə (Cambridge English Qualifications), Kembric İngilis dili üzrə Tədris (Cambridge English Teaching) imtahanlarını təklif edir. Dövlət İmtahan Mərkəzi tələb əsasında Kembric İngilis dili üzrə Səviyyə Testi (Cambridge English Placement Test - CEPT) də təşkil edir.

İmtahana qeydiyyat https://eservices.dim.gov.az/iexams/az/login.aspx linki vasitəsilə keçirilir.

Əlavə məlumat almaq üçün international@dim.gov.az elektron poçt ünvanı ilə əlaqə saxlamaq mümkündür.

İmtahana gələn namizədlər mütləq şəkildə şəkilli şəxsiyyət vəsiqəsini və Confirmation of Entry (CoE) sənədini (international@dim.gov.az ünvanından göndərilir) özləri ilə gətirməlidirlər. İmtahan otağına yalnız şəxsiyyət vəsiqəsi, su, sadə karandaş (göy diyircəkli qələmdən istifadəyə icazə verilmir), pozan və karandaşyonan aparılmasına icazə verilir.