DİM rəqəmsal SAT imtahanı keçirəcək

Dövlət İmtahan Mərkəzi oktyabrın 3-də növbəti rəqəmsal SAT imtahanını təşkil edəcək. Test prosesi qurumun Bakıdakı hər iki inzibati binasında paralel şəkildə aparılacaq.

Direktor.az xəbər verir ki, bu barədə DİM-dən bildirilib. İmtahana qatılacaq şəxslərin yalnız buraxılış vərəqəsində qeyd edilən ünvana gəlmələri vacibdir.

Test mərkəzləri aşağıdakı ünvanlarda yerləşir:

Bakı şəhəri, Akademik Həsən Əliyev küçəsi, 299 (TC60129)

Bakı şəhəri, Süleyman Sani Axundov küçəsi, 50 (TC56582)

Namizədlər ən geci saat 07:15-də müvafiq mərkəzə yaxınlaşmalıdırlar.

İmtahana buraxılış üçün aşağıdakıların olması mütləqdir:

Fotoşəkilli şəxsiyyət vəsiqəsi və ya xarici pasport;

Çap olunmuş buraxılış vərəqəsi (“Admission Ticket”);

“College Board” standartlarına cavab verən noutbuk və ya planşet (şarj cihazı/adapterlə birgə).

Sənədlərində çatışmazlıq və ya fərqlilik aşkar edilən, eləcə də öz elektron cihazını gətirməyən və ya cihazı yoxlamadan keçirməyən namizədlər sınağa buraxılmayacaqlar. İştirakçılar zərurət olduqda özləri ilə kalkulyator və qələm (karandaş) götürə bilərlər. Qaralama vərəqləri isə mərkəz tərəfindən veriləcək.

Xatırladaq ki, iştirakçılar imtahana ən geci 5 gün qalmış “Bluebook” tətbiqinə daxil olaraq sınaq öncəsi texniki sazlamanı (“test set-up”) yekunlaşdırmalıdırlar. Buraxılış vərəqəsi məhz bu addım tamamlandıqdan sonra sistemdə aktivləşir.

Qeyd edək ki, DİM cari il ərzində hər iki ünvanda daha iki rəqəmsal SAT imtahanı təşkil etməyi planlaşdırır:

7 noyabr 2026

5 dekabr 2026

Ətraflı məlumat almaq üçün rəsmi resurslara müraciət edə bilərsiniz:

DİM-in rəsmi səhifəsi: https://dim.gov.az/az/fealiyyet/qebul-ve-imtahanlar/sat

“College Board” platforması: https://satsuite.collegeboard.org/digital

Namizədlər yaranan suallarla bağlı DİM-in Beynəlxalq əməkdaşlıq şöbəsinə (international@dim.gov.az) müraciət edə bilərlər.