DİM “Ünsiyyət bacarıqlarının inkişafı” adlı təlim keçirib

Azərbaycan Respublikası Prezidentinin 22 iyul 2022-ci il tarixli Sərəncamı ilə təsdiq olunmuş “2022-2026-cı illərdə sosial-iqtisadi inkişaf Strategiyası” çərçivəsində Dövlət İmtahan Mərkəzi mərkəzi icra hakimiyyəti orqanlarının əməkdaşları üçün növbəti maarifləndirici tədbir təşkil edib.

Direktor.az xəbər verir ki, bu barədə DİM-dən bildirilib. Dövlət qulluqçularının peşəkar potensialının artırılmasına yönəlmiş “Ünsiyyət bacarıqlarının inkişafı” mövzusundakı təlim proqramı 21-22 sentyabr tarixlərində qurumun inzibati binasında baş tutub. Təlimçi Tural İsgəndərovun rəhbərliyi ilə baş tutan sessiyalarda iştirakçılara effektiv kommunikasiyanın fundamental prinsipləri, o cümlədən Shennon–Viver modeli, şifahi və yazılı ünsiyyət formaları, auditoriyanın xüsusiyyətlərinə uyğun yanaşmanın seçilməsi və inandırıcı nitq texnikaları həm nəzəri, həm də praktiki baxımdan ətraflı şəkildə çatdırılıb. Eyni zamanda tədbirdə informasiyanın düzgün qavranılması, insanların davranışına təsir mexanizmləri, dialoqa açıqlıq və işgüzar görüşlərdə yönləndirici ünsiyyət vasitələrindən istifadə qaydaları təhlil olunub. İnteraktiv mühitdə keçən təlim dinləyicilərin suallarının cavablandırılması və mövzu ətrafında aparılan geniş fikir mübadiləsi ilə başa çatıb.