Dövlət qulluğuna qəbul imtahanları keçiriləcək

Dövlət qulluğuna qəbul üzrə növbəti test imtahanları keçiriləcək.

Direktor.az xəbər verir ki, Dövlət İmtahan Mərkəzi sentyabrın 24-də dövlət qulluğunda inzibati rəhbər (A növü – AB, AC altqrupları) və inzibati icraçı (B növü – BA, BB altqrupları) vəzifələri üzrə növbəti test imtahanlarını təşkil edəcək.

Kompüter vasitəsilə elektron formada keçiriləcək imtahanlar Bakı və Naxçıvan şəhərlərində baş tutacaq. Prosesin şəffaf və nizamlı idarə olunması məqsədilə 2 ümumi imtahan rəhbəri, 20 zal inzibatçısı, 117 nəzarətçi və buraxılış rejiminə cavabdeh 18 əməkdaş cəlb edilib.

İki növbədə təşkil olunacaq sınaqlar saat 10:00 və 16:00-da başlayacaq. Qaydalara əsasən, qeyd olunan vaxtlara 15 dəqiqə qalmış (müvafiq olaraq 09:45 və 15:45-dən sonra) imtahan binasına yaxınlaşan şəxslər zallara buraxılmayacaq.

Xatırladaq ki, avqustun 20-dən sentyabrın 9-dək davam edən qeydiyyat prosesində ümumilikdə 1753 namizəd müraciət edib. İştirakçılar imtahanın keçiriləcəyi ünvan, bina və vaxt barədə məlumatları əks etdirən “İmtahana buraxılış vərəqəsi”ni DİM-in rəsmi internet səhifəsindəki (https://exidmet.dim.gov.az/elimt/) müvafiq elektron xidmət bölməsindən çap edə bilərlər.

İmtahan binasına daxil olmaq üçün namizədlərdən şəxsiyyəti təsdiq edən sənədin əsli və çap olunmuş buraxılış vərəqəsi tələb olunur.