OYU tələbəsi beynəlxalq elmi konfranslarda iştirak edib

Odlar Yurdu Universitetinin Biologiya ixtisasının IV kurs tələbəsi Ellada Abbasova beynəlxalq elmi platformalarda iştirak edərək hazırladığı elmi tədqiqat işlərini təqdim edib.

Direktor.az xəbər verir ki, bu barədə universitetdən bildirilib. Ellada Abbasovanın “Epigenetic Signatures in Rare Genetic Diseases: From Molecular Mechanisms to Diagnostic Opportunities” adlı elmi işi 9–11 sentyabr 2026-cı il tarixlərində Praqa, Çexiya və onlayn formatda keçirilən 8th CCP Phenogenomics Conference 2026 beynəlxalq elmi konfransında qəbul olunub və konfransın rəsmi abstrakt kitabında dərc edilib.

Tələbə konfransda onlayn formatda iştirak edərək elmi işini poster formatında təqdim edib. Müxtəlif ölkələrdən professor, doktor və tədqiqatçıların iştirak etdiyi konfransda Ellada Abbasova Azərbaycanı təmsil edən yeganə iştirakçı olub.

Bununla yanaşı, Ellada Abbasova “IBSC 2026 – 10th Joint International PSU-UNS Bioscience Conference” beynəlxalq konfransında da iki elmi poster işi ilə iştirak edib. Prince of Songkla University (Tailand), University of Novi Sad (Serbiya) və BioSense İnstitutunun təşkilatçılığı ilə keçirilən konfrans “Bio4Future – Life Sciences for a Sustainable and Smart Future” şüarı altında təşkil olunub.

Konfransda Ellada Abbasovanın aşağıdakı elmi işləri poster formatında təqdim edilib: “Emerging MicroRNA Biomarkers and Circulating Epigenetic Signatures in Non-Invasive Early Disease Diagnostics” və “Investigating The Therapeutic Potential and Molecular Mechanisms of Bioactive Natural Compounds in Targeting Cancer Cell Metabolism”

Tələbənin tədqiqat işləri Təşkilat Komitəsi tərəfindən bəyənildiyi üçün konfrans rüsumundan azadolma (Registration Fee Waiver) güzəşti təqdim olunub. Ellada Abbasovanın beynəlxalq elmi konfranslarda iştirakı onun tələbəlik dövründə elmi-tədqiqat fəaliyyətinə fəal şəkildə cəlb olunduğunu və beynəlxalq elmi mühitdə təcrübə qazandığını nümayiş etdirir.