Qarabağda yeni dərs ili: 7 yeni məktəbdə ilk zəng səslənib

İşğaldan azad edilmiş yurd yerlərində ilk dəfə Bilik Günü qeyd olunub

2026-cı il sentyabrın 15-də işğaldan azad edilmiş ərazilərdə yeni istifadəyə verilən bir sıra ümumi təhsil müəssisələrində ilk dəfə Bilik Günü təntənəsi yaşanıb.

Qarabağ Regional Təhsil İdarəsinin idarəçiliyində olan və bu tədris ilində şagirdlərin ixtiyarına verilən aşağıdakı təhsil ocaqlarında ilk zəng səslənib:

Ağdam şəhər 1 nömrəli tam orta məktəbi

Ağdərə rayonu Aşağı Oratağ kənd tam orta məktəbi

Xankəndi şəhəri Kərkicahan qəsəbəsi 1 nömrəli tam orta məktəbi

Xocavənd rayonu Qırmızıbazar qəsəbə tam orta məktəbi

Xocavənd şəhəri 1 nömrəli tam orta məktəbi

Xocalı rayonu Təzəbinə kənd tam orta məktəbi

Xocalı rayonu Xanyurdu kənd tam orta məktəbi

Qeyd olunan məktəblərin fəaliyyətə başlaması Böyük Qayıdış proqramı çərçivəsində bərpa olunan regionlarda müasir təhsil mühitinin yenidən qurulmasının və davamlı tədris prosesinin təmin edilməsinin bariz nümunəsidir.

Məlumat üçün bildirək ki, hazırda Qarabağ Regional Təhsil İdarəsi üzrə azad olunmuş rayonlarda (Ağdam, Füzuli, Xocalı, Xocavənd və Şuşa) ümumilikdə 19 məktəb fəaliyyətini davam etdirir.