Şagirdlərin gündəlikləri ilə iş- Məktəb situasiyaları

   "Mənim sinfim: 15 sentyabrdan son zəngə qədər"
V–IX siniflərin sinif rəhbərinə praktik dəstək - kitabımdan...

Elşən Qafarov. Məktəbşünas 

Gündəlik nə üçün lazımdır ? Gündəlik şagirdin məktəb həyatının ən sadə, amma ən çox istifadə olunan sənədidir. O, üç işə xidmət edir: şagirdə öz işini planlaşdırmağı öyrədir, valideyni məktəb həyatından xəbərdar edir və şagirdin nailiyyətlərini bir yerdə toplayır. Hazırda bir çox məktəbdə qiymətlər və davamiyyət elektron jurnalda aparılır, valideyn isə onları elektron sistemdəki şəxsi kabinetindən görür. Bu, kağız gündəliyin lazımsız olduğu demək deyil. Elektron sistem qiyməti göstərir, kağız gündəlik isə şagirdin özünün apardığı iş planıdır: dərs cədvəli, ev tapşırıqları, son tarixlər, öz qeydləri. Ona görə sinif rəhbəri hər iki vasitədən bir-birini tamamlayan şəkildə istifadə edir. V sinifdə gündəlik aparmaq bacarığı xüsusi öyrədilməlidir. Bu sinifdə şagirdin məktəb həyatında çox şey dəyişir: fənlərin və müəllimlərin sayı artır, ev tapşırıqları müxtəlifləşir. Gündəliyini düzgün aparan şagird bu yükün öhdəsindən daha asan gəlir. VIII–IX siniflərdə isə gündəlik artıq şagirdin öz vaxtını və hazırlığını idarə etməsinin vasitəsinə çevrilməlidir.