SDU-da insan alverinə qarşı seminar keçirilib

Sumqayıt Dövlət Universitetində (SDU) tələbələrin hüquqi savadlılığını artırmaq və onları təhlükəli hallardan qorumaq məqsədilə insan alverinə qarşı maarifləndirici seminar təşkil olunub.

Direktor.az xəbər verir ki, tədbir Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Polisə Dəstək” İctimai Birliyinin icra etdiyi “İnsan alverinə qarşı mübarizədə təhsil müəssisələrinin rolunun gücləndirilməsi” layihəsi çərçivəsində baş tutub. Görüş universitetin kiçik akt zalında keçirilib. Tədbirin əsas məqsədi gəncləri bu qlobal problemin fəsadları, qorunma mexanizmləri və mövcud hüquqi baza barədə ətraflı məlumatlandırmaq olub.

Toplantını giriş sözü ilə açan SDU-nun Sosial məsələlər və ictimaiyyətlə əlaqələr üzrə prorektoru, dosent Elmar Xəlilov insan alverinin transmilli mütəşəkkil cinayətin ən təhlükəli təzahürlərindən biri kimi fundamental insan haqlarına ciddi zərbə vurduğunu bildirib. O, bu təhdidlə mübarizədə qabaqlayıcı tədbirlərin, xüsusən gənclər arasında aparılan ardıcıl maarifləndirmə işlərinin həlledici rol oynadığını diqqətə çatdırıb. Prorektor rəhbərlik etdiyi ali təhsil ocağının “Polisə Dəstək” İB ilə tərəfdaşlıq əlaqələrinin uğurla davam etdiyini və birgə layihələrin davamlı xarakter daşıdığını qeyd edib.

Daha sonra “Polisə Dəstək” İctimai Birliyinin sədri Şəmsəddin Əliyev, hüquqşünas Aydın Kərimov və Sumqayıt Şəhər Polis İdarəsinin təmsilçisi Mahir Qurbanov mövzu üzrə məruzələrlə çıxış ediblər. Ekspertlər cinayəti şərtləndirən sosial-iqtisadi səbəblər, risk faktorları, qurbanların hüquqi müdafiəsi və reabilitasiyası prosesindən söz açıblar.

Çıxışçılar, həmçinin dövlət başçısının müvafiq Sərəncamı ilə qüvvəyə minən “Azərbaycan Respublikasında insan alverinə qarşı mübarizəyə dair 2026–2030-cu illər üçün Milli Fəaliyyət Planı”nın prioritet hədəflərinə toxunublar. Bildirilib ki, sənəddə təhsil ocaqlarının prosesə fəal cəlb olunması və profilaktik addımların genişləndirilməsi xüsusi vurğulanır.

Tədbirin yekununda auditoriyaya şübhəli və riskli hallarla üzləşdikdə operativ addım atma qaydaları, müvafiq dövlət strukturlarına müraciət yolları izah edilib, tələbələri maraqlandıran suallar cavablandırılıb.