SDU ilə Malayziya ali məktəbi arasında müqavilə imzalanıb

SDU qlobal əlaqələrini Malayziyaya qədər genişləndirir: SEGi Universiteti ilə əməkdaşlıq müqaviləsi imzalanıb.

Direktor.az xəbər verir ki, bu barədə Sumqayıt Dövlət Universitetindən bildirilin. SDU beynəlxalq əməkdaşlıq coğrafiyasını zənginləşdirməyə davam edir. Universitet Malayziyanın qabaqcıl ali məktəblərindən sayılan SEGi Universiteti ilə akademik və elmi tərəfdaşlığın əsasını qoyan yeni müqaviləyə imza atıb. Tərəflər arasında təşkil olunan onlayn görüş çərçivəsində rəsmiləşən razılaşma iki təhsil ocağı arasında inteqrasiyanın dərinləşməsinə xidmət edir.

İmzalanmış sənədə əsasən, tərəflər birgə elmi araşdırmaların aparılması, qlobal layihələrin icrası və qabaqcıl təcrübələrin bölüşdürülməsi üzrə vahid platformada fəaliyyət göstərəcəklər. Əməkdaşlığın əsas prioritetlərindən biri kimi tələbələrin və professor-müəllim heyətinin qarşılıqlı mübadilə proqramlarına cəlb olunması nəzərdə tutulur.

Görüşdə çıxış edən SDU-nun rektoru, professor Nurəli Yusifbəyli rəhbərlik etdiyi müəssisənin elmi potensialı, müasir təhsil imkanları və strateji hədəflərindən bəhs edib. Rektor vurğulayıb ki, qlobal səviyyədə tərəfdaşlıqların artırılması universitetin elmi infrastrukturunun güclənməsində və təhsil keyfiyyətinin yüksəldilməsində həlledici rol oynayır.

Sonra SEGi Universitetinin rektoru, professor Dr. Mariani Binti Md Nor qurulan yeni körpünün əhəmiyyətinə toxunaraq, tərəfdaşlıqdan məmnunluğunu bildirib. O, əldə olunan razılaşmanın həm müəllim və tələbələr üçün geniş təcrübə üfüqləri açacağını, həm də gələcək elmi təşəbbüslərə təkan verəcəyini qeyd edib.

Müzakirələr zamanı nümayəndə heyətləri müasir təhsil standartlarının tətbiqi, birgə tədqiqat imkanları və mobillik proqramlarının reallaşdırılması mexanizmləri ətrafında fikir mübadiləsi aparıblar.

Malayziyanın aparıcı özəl təhsil ocaqlarından biri olan SEGi Universiteti aktiv elmi fəaliyyəti ilə tanınır və "QS Dünya Universitetləri Reytinqi"ndə 701–710-cu yerlər aralığında qərarlaşıb.