Sinif rəhbərinin vəzifə öhdəlikləri . Məktəb situasiyaları

 "Mənim sinfim: 15 sentyabrdan son zəngə qədər"
V–IX siniflərin sinif rəhbərinə praktik dəstək - kitabımdan...

Elşən Qafarov. Məktəbşünas

Sinif rəhbərinin işi nədən asılıdır. Sinif rəhbərinin işi hər məktəbdə və hər sinifdə eyni qurulmur, onun həcmi və məzmunu bir neçə şərtdən asılıdır. Birinci şərt məktəbdə təlim-tərbiyə prosesinin təşkilidir: məktəbin bir və ya iki növbədə işləməsi, sinifdəki şagird sayı, dərnəklərin və idman bölmələrinin olub-olmaması sinif rəhbərinin imkanlarını müəyyən edir. İkinci şərt məktəbin və sinfin tərbiyə işi ənənələri, o cümlədən şagird özünüidarəsinin nə dərəcədə qurulmasıdır. Üçüncü şərt məktəbin və ailələrin uşağın sağlamlığını qorumaq imkanlarıdır: tibb otağının olması, idman zalının vəziyyəti, ailənin uşağın qidalanmasına və yuxusuna diqqəti. Dördüncü şərt şagirdlərin yaş xüsusiyyətləridir. V–VI siniflərdə uşaq hələ müəllimə çox bağlıdır, VII–IX siniflərdə isə yeniyetmə müstəqillik istəyir və yaşıdlarının fikrinə daha çox önəm verir. Beşinci şərt sinifdə dərs deyən müəllimlərin dərsdənkənar işə hazırlığı və sinif rəhbəri ilə birgə işləmək istəyidir. Ona görə sinif rəhbəri başqa məktəbin hazır planını götürmür, işini öz məktəbinin və sinfinin real şəraitinə görə qurur.