Sinif rəhbərinin vəzifə Təlimatı V-IX siniflər. Əhəmiyyəti, icrası və nəzarət. PDF

   "Mənim sinfim: 15 sentyabrdan son zəngə qədər"
V–IX siniflərin sinif rəhbərinə praktik dəstək - kitabımdan...

Elşən Qafarov. Məktəbşünas

Təlimat niyə lazımdır. Məktəbdə tez-tez belə vəziyyət yaranır: sinif rəhbəri çox çalışır, amma ondan nə gözlənildiyini dəqiq bilmir. Bir rəhbər ondan tədbir sayı, digəri foto-hesabat, üçüncüsü isə yalnız davamiyyət tələb edir. Nəticədə sinif rəhbəri vaxtının çoxunu kağıza sərf edir, şagirdə isə az vaxt qalır. Vəzifə təlimatı bu qarışıqlığı aradan qaldırır. O, sinif rəhbərinin nə etməli olduğunu, nəyi etmədiyini, kimə tabe olduğunu və kiminlə birgə işlədiyini aydın göstərir. Təlimat həm də sinif rəhbərini qoruyan sənəddir. Onda yazılıb ki, sinif rəhbəri intizam tədbiri barədə yekun qərar vermir, psixoloji müayinə aparmır və başqa mütəxəssisin işini görmür. Orada həm də göstərilib ki, sinfin aşağı nəticəsi özlüyündə sinif rəhbərinin günahı sayılmır. Bu, müəllimi əsassız ittihamdan qoruyur və ona öz işinə diqqət yetirməyə imkan verir. Təlimat şagird və valideyn üçün də vacibdir, çünki onlar sinif rəhbərindən nə gözləyə biləcəklərini bilirlər.