Təhsildə Keyfiyyət Təminatı Agentliyi peşə ixtisasları üzrə mütəxəssislərin biliklərini qiymətləndirib

Təhsildə Keyfiyyət Təminatı Agentliyi (TKTA) “Arıçı” və “Elektrik qaz qaynaqçısı” peşə ixtisasları üzrə nəzəri imtahanlar həyata keçirib.

Direktor.az xəbər verir ki, Bərdə Dövlət Peşə Təhsil Mərkəzində təşkil olunan imtahanlarda 33 nəfər iştirak edib.

Məlumat üçün bildiririk ki, qeyri-formal və informal yollarla əldə edilmiş bilik, bacarıq, səriştə və təcrübənin qiymətləndirilməsi və tanınması prosesi iki mərhələdən ibarətdir. İlk mərhələdə ərizəçilər biliklərin qiymətləndirilməsi məqsədilə nəzəri imtahanlara cəlb olunurlar. Nəzəri imtahanı uğurla keçən namizədlər ikinci mərhələdə, yəni bacarıq, səriştə və təcrübənin qiymətləndirilməsi məqsədilə təşkil edilən praktiki imtahanda iştirak hüququ əldə edirlər. Hər iki mərhələdə uğur qazanan şəxslərə yekunda müvafiq peşə sənədi təqdim edilir.

Qeyd edək ki, TKTA tərəfindən təqdim edilən diplom və sertifikat Azərbaycan Respublikasının Nazirlər Kabinetinin 5 avqust 2020-ci il tarixli 279 nömrəli Qərarına əsasən sahibinə peşə ixtisası üzrə əmək fəaliyyətinə başlamaq hüququ verir. Eyni zamanda sözügedən diplom ilk peşə təhsili səviyyəsində təhsil haqqında sənədə bərabər tutulur və peşə təhsili pilləsinin növbəti səviyyəsində təhsilini davam etdirmək hüququ verir.

İmtahanlarda iştirak etmək istəyən şəxslər müvafiq keçid linki vasitəsilə qeydiyyatdan keçə bilər (https://tinyurl.com/53jmtf8z), həmçinin (+99450) 443-77-89 mobil nömrəsi ilə əlaqə saxlaya və ya TKTA-nın rəsmi internet səhifəsi vasitəsilə (https://tkta.edu.az) müraciət edə bilərlər.