Təhsildə yeni innovasiya erası: Emin Əmrullayevdən texnoloji inkişaf mesajı

Emin Əmrullayev: Təhsil sahəsində əsas hədəflərdən biri ölkəmizin yeni texnologiyalar yaradan tərəfə çevrilməsidir.

Direktor.az xəbər verir ki, bu fikirləri elm və təhsil naziri Emin Əmrullayev “Baku ID 2026” innovasiya festivalında söyləyib.

Rəqəmsal bacarıqların inkişaf etdirilməsi ilə yanaşı, fundamental təhsil keyfiyyətinin yüksəldilməsi mühüm prioritetlər sırasındadır. Beynəlxalq PISA qiymətləndirməsinin son göstəriciləri bu istiqamətdə nəzərəçarpacaq müsbət dinamikanın formalaşdığını, xüsusən də riyaziyyat fənni üzrə şagird nailiyyətlərində artım qeydə alındığını nümayiş etdirir.

Bu barədə elm və təhsil naziri Emin Əmrullayev “Baku ID 2026” innovasiya festivalındakı çıxışı zamanı məlumat verib.

Nazir bildirib ki, cəmiyyətdə rəqəmsal savadlılığın gücləndirilməsi məqsədilə tədris proqramlarının dövrün tələblərinə uyğunlaşdırılması, pedaqoji heyətin peşəkarlığının artırılması, məktəblərin maddi-texniki və innovativ bazasının möhkəmləndirilməsi təmin edilir. Eyni zamanda, “Rəqəmsal bacarıqlar” və STEAM formatlı layihələrin tətbiq dairəsi əhəmiyyətli dərəcədə genişləndirilir.

İnsan kapitalının formalaşmasında xaricdə təhsil imkanlarının rolu da xüsusi vurğulanıb. Qeyd edilib ki, hər il 300-dən artıq azərbaycanlı gəncin kibertəhlükəsizlik, informasiya texnologiyaları və digər strateji istiqamətlər üzrə qlobal miqyasda nüfuzlu universitetlərdə təhsilə cəlb edilməsi ölkəmizdə yüksəkixtisaslı milli kadr bazasının formalaşmasına güclü zəmin yaradır.

Çıxışının sonunda nazir diqqətə çatdırıb ki, aparılan islahatların başlıca qayəsi Azərbaycanın yalnız hazır texnoloji həlləri mənimsəyən istifadəçi kimi deyil, eyni zamanda müasir innovasiyalar və rəqəmsal məhsullar formalaşdıran aparıcı tərəf kimi mövqeyini möhkəmləndirməkdir.

“Ümumilikdə, qarşımızda hələ çox uzun yol var. Biz bu səyahətin başlanğıcındayıq. Əsas məsələ istiqamətin fərqində olmaq, görülməli işləri düzgün müəyyənləşdirmək və inkişaf dinamikasını qorumaqdır. Eyni tempdə davam etdiyimiz halda proqramları daha da təkmilləşdirə bilərik”, - deyə nazir bildirib.