UNEC tələbələri 2000 dollar pul mükafatı qazanıblar

UNEC tələbələri "GameTech Bootcamp" hakatonunun qalibi olublar.

İnnovasiya və Rəqəmsal İnkişaf Agentliyi, "Digital Azerbaijan", "Xsolla", "Starnest" və "GDG Baku"nun birgə tərəfdaşlığı ilə oyun texnologiyaları sahəsini əhatə edən "GameTech Bootcamp" hakatonu baş tutub.

Gənclərin texnoloji təşəbbüslərini dəstəkləmək məqsədilə təşkil olunan yarışa 91 komanda tərkibində 270-dən artıq iştirakçı müraciət edib. İlkin seçim mərhələsindən uğurla keçən 16 ən güclü komanda finala vəsiqə qazanaraq üç gün ərzində öz innovativ ideyalarını inkişaf etdirib və işlək prototiplərini münsiflər heyətinə nümayiş etdiriblər.

Gərgin rəqabət şəraitində keçən texnologiya yarışında Azərbaycan Dövlət İqtisad Universitetinin təmsilçilərindən ibarət "UNECom" komandası böyük nailiyyətə imza atıb. Komanda təqdim etdiyi proqram təminatının keyfiyyəti və qabaqcıl texniki həllinə görə "Best Code" (Ən Yaxşı Kod) nominasiyası üzrə birinci yerə layiq görülüb.

Hakatonun çempionu adını qazanan UNEC komandası 2 000 ABŞ dolları məbləğində pul mükafatı ilə təltif edilib.