20 minə yaxın müəllimin maaşı artırılacaq

Ümumi təhsil müəssisələrində çalışan pedaqoji heyətin bilik və bacarıqlarının qiymətləndirilməsini nəzərdə tutan sertifikasiya prosesində əsas mərhələ başa çatıb. 2022-ci ildə ilkin olaraq Bakı, Abşeron və Sumqayıt üzrə start verilən imtahanlar mərhələli şəkildə genişləndirilərək bütün respublika məktəblərini əhatə edib.

İndiyədək təxminən 104 min müəllim sertifikatlaşdırmaya cəlb olunub və onların böyük əksəriyyəti — 91 min nəfərə yaxını uğur qazanıb. Nəticədə həmin müəllimlərin maaşlarına artımlar tətbiq olunub. Uğur göstərən pedaqoqlardan 20 min nəfərə yaxınının əməkhaqqı isə yeni tədris ilindən etibarən artımla hesablanmağa başlanıb və onlar artıq cari aydan etibarən yüksək maaş alacaqlar.

Direktor.az xəbır verir ki, mövzu ilə bağlı Ümumi Təhsil üzrə Dövlət Agentliyinin direktoru Eşqi Bağırov İctimai Televiziyanın “Pressinq” verilişində danışıb:

“Burada iki yanaşma tətbiq olunur. Minimal keçid balı ilə prosesdən uğurla keçən müəllimlər 10 faiz əlavə əməkhaqqı alırlar, eyni zamanda, ən yüksək nəticə göstərən, 51 baldan yüksək bal toplayan müəllimlərimiz isə 35 faizlik əlavə almağa başlayırlar. Sertifikasiya prosesində dəyişikliklərdən biri də müəllimlərin əməyinin stimullaşdırılmasıdır. Əməkhaqqıya, rifaha təsir edən növbəti məsələ, ümumilikdə sistem üzrə müəllim şəbəkəsinin optimallaşdırılması ilə bağlıdır. Bildiyiniz kimi, 2022-ci ildən, sertifikasiyaya başladığımız ildən 2026-cı ilə qədər olan dövrdə, eyni zamanda, müəllimlərin dərs yükü də artıb. Ümumilikdə orta dərs yükü 18 saatdan 20 saata qədər artıb. Ölkə miqyasında baxsaq, bu artım özlüyündə də əməkhaqqının artımına səbəb olur”.