44 mindən çox gənc peşə təhsilinə cəlb olunub

Yeni tədris ilində 44 mindən çox gənc peşə təhsilinə cəlb olunur — Dərsliklər yenilənir, infrastruktur genişlənir

Sentyabrın 15-dən etibarən ölkənin peşə təhsili müəssisələrində 2026/2027-ci tədris ilinə rəsmən start verilib. Yeni tədris ilində respublika üzrə fəaliyyət göstərən 79 peşə məktəbi və mərkəzində 151 müxtəlif ixtisas istiqamətində ümumilikdə 44 700 nəfər təhsilini davam etdirəcək. Cari ilin tələbə qəbulu imtahan və müsabiqələrində uğurlu nəticə göstərən 27 968 gənc peşə ixtisasları üzrə ilk dəfə təhsil almaq imkanı qazanıb.

İxtisaslaşmış təhsil modelləri üzrə göstəricilər də diqqət çəkir. Cari akademik ildə tələbələrin 2 224-ü nəzəri biliklərlə yanaşı birbaşa istehsalat mühitində tətbiqi bacarıqlar qazandıran dual peşə təhsili proqramına qəbul edilib. Yüksək texniki peşə təhsili pilləsində təhsil hüququ əldə edənlərin sayı isə 2 798 nəfər təşkil edib.

Yeni dərs ilində əmək bazarının tələblərinə cavab verən 4 tam yeni ixtisas üzrə kadr hazırlığına başlanılıb. Bundan əlavə, tədrisin məzmununun müasirləşdirilməsi çərçivəsində texniki və yüksək texniki peşə səviyyələri üzrə təhsil proqramlarının kurikulum və tədris planlarında əsaslı dəyişikliklər aparılıb. Tələbələrin keyfiyyətli tədris vəsaitləri ilə təmin edilməsi məqsədilə 57 adda yeni dərslik işıq üzü görüb. Bu nəşrlərə yerli mütəxəssislərin müəllifliyi ilə hazırlanan dərsliklərlə yanaşı, qabaqcıl xarici mənbələrdən dilimizə tərcümə olunmuş ədəbiyyatlar da daxildir.

Tədris ocaqlarının maddi-texniki bazasının gücləndirilməsi də paralel şəkildə aparılır. “Azərbaycan Respublikasının 2022–2026-cı illərdə sosial-iqtisadi inkişaf Strategiyası” çərçivəsində cari tədris ilində 8 peşə məktəbinin əsaslı təmiri və müasir tələblərə uyğun şəkildə yenidən qurulması mərhələsi tamamlanmaq üzrədir.

Eyni zamanda, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na müvafiq olaraq, tarixi torpaqlarımızda peşə təhsili infrastrukturunun layihələndirilməsi, bərpası və yenidən qurulması istiqamətində irimiqyaslı işlər fasiləsiz davam etdirilir.