AMEA-da Pakistan ədəbiyyatı araşdırılır

AMEA Ədəbiyyat İnstitutunda Pakistan ədəbiyyatı üzrə elmi araşdırmalar genişləndirilir

Direktor.az Azərtaca istinadla xəbər verir ki, Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda Pakistanın zəngin ədəbi irsinin müxtəlif istiqamətləri üzrə genişmiqyaslı elmi tədqiqat işləri davam etdirilir.

Mövzu ilə bağlı açıqlama verən institutun Azərbaycan-Asiya ədəbi əlaqələri şöbəsinin baş elmi işçisi, filologiya elmləri doktoru, dosent Bəsirə Əzizəliyeva qeyd edib ki, rəhbərlik etdiyi bölmədə Pakistan ədəbiyyatının nəzəri təhlili ilə yanaşı, bu ölkənin görkəmli sənətkarlarının əsərlərinin yerli oxuculara çatdırılması istiqamətində ardıcıl tədbirlər həyata keçirilir. Bu çərçivədə, şöbə müdiri, professor Bədirxan Əhmədlinin təşəbbüsü əsasında Pakistanın tanınmış şairi Sultan Bahunun qələmindən çıxan əsərlərdən seçmələr ana dilimizə tərcümə olunaraq ictimaiyyətə təqdim edilib.

Alim həmçinin müasir Pakistan diaspor ədəbiyyatının nüfuzlu simalarından sayılan Nadim Aslamın bədii yaradıcılığını tədqiqat mərkəzində saxladığını və bu mövzuda silsilə elmi məqalələr dərc etdirdiyini bildirib.

Hazırda şöbədə Pakistan bədii fikir tarixinə həsr olunan iki mühüm dissertasiya işi üzərində iş aparılır. Araşdırmalar “XXI əsr ingilisdilli Pakistan bədii nəsri” və “Sultan Bahunun yaradıcılığı: ənənə və müasirlik” mövzularını əhatə edir.

B.Əzizəliyeva AMEA ilə Pakistan Ədəbiyyat Akademiyası arasında formalaşan tərəfdaşlığın hər iki xalqın mədəni sərvətlərinin qarşılıqlı təbliği baxımından böyük əhəmiyyət kəsb etdiyini xatırladıb. O əlavə edib ki, Azərbaycan ədəbiyyatının Pakistanın elmi-ədəbi dairələrində geniş təbliği milli mədəniyyətimizin beynəlxalq arenada tanıdılmasına mühüm töhfə verir.