Dağlıq Şirvan RTİ-nin məktəblərində iclas keçirilib

Dağlıq Şirvan məktəblərində yeni tədris ili öncəsi Pedaqoji Şura iclasları keçirilib.

Dağlıq Şirvan Regional Təhsil İdarəsinin tabeliyində fəaliyyət göstərən ümumtəhsil müəssisələrində 2026–2027-ci tədris ilinin başlanması münasibətilə Pedaqoji Şura toplantıları təşkil olunub.

İclaslarda təhsil işçilərinin ənənəvi sentyabr konfransında toxunulan əsas məsələlər və strateji hədəflər pedaqoji kollektivlərin diqqətinə çatdırılıb. Toplantıların gündəliyində ötən dövr üzrə şagird nailiyyətlərinin qiymətləndirilməsi mühüm yer alıb; bu çərçivədə IV və VI siniflərdə təşkil olunmuş monitorinqlərin, eləcə də IX və XI siniflər üzrə buraxılış imtahanlarının nəticələri dərindən təhlil edilib, mövcud akademik göstəricilər ətrafında fikir mübadiləsi aparılıb.

Pedaqoji Şura çərçivəsində tədrisin keyfiyyətinin yüksəldilməsi məqsədilə dərslərin düzgün bölgüsü, innovativ metod və yanaşmaların tətbiqi, şagirdlərin bacarıqlarının inkişafı və davamiyyətə nəzarət mexanizmlərinin gücləndirilməsi məsələləri nəzərdən keçirilib. Eyni zamanda istedadlı şagirdlərin potensialının üzə çıxarılaraq onların müsabiqə və layihələrə cəlb edilməsi, tədrisdə geriləyən şagirdlərə fərdi qayğı və metodiki yanaşmanın təmin olunması, eləcə də məktəblə ailə arasında əlaqələrin möhkəmləndirilməsi istiqamətində əməli addımlar müəyyənləşdirilib.

Yekunda yeni tədris ilində ümumi təhsilin məzmun və keyfiyyət baxımından inkişaf etdirilməsi üçün qarşıda duran başlıca prioritet vəzifələr təsdiqlənib.