Azərbaycan–Özbəkistan elmi qrant müsabiqəsinin qalibləri məlum olub

Elm və Təhsil Nazirliyi yanında Elm və Ali Təhsil üzrə Dövlət Agentliyi ilə Özbəkistan Respublikasının Ali Təhsil, Elm və İnnovasiyalar Nazirliyi yanında İnnovativ İnkişaf Agentliyinin birgə təşkil etdiyi Azərbaycan–Özbəkistan beynəlxalq elmi qrant müsabiqəsinə yekun vurulub.

Direktor.az Azərtaca istinadla xəbər verir ki, iki ölkənin ali təhsil ocaqları və elmi-tədqiqat institutları arasında əməkdaşlığı genişləndirmək, elm adamlarının qarşılıqlı əlaqələrini gücləndirmək və aktual sahələr üzrə müştərək tədqiqatları dəstəkləmək məqsədilə təşkil olunan müsabiqə çərçivəsində təqdim edilmiş 139 birgə elmi layihə ekspertizadan keçirilib. Hər iki dövlətin mütəxəssislərinin apardığı elmi və texniki qiymətləndirmələrin yekunlarına əsasən, ən yüksək göstərici əldə edən 5 layihə qalib seçilib.

Müsabiqənin yekun nəticələrinə əsasən, Elm və Təhsil Nazirliyinin Kimya İnstitutu ilə İslam Kərimov adına Daşkənd Dövlət Texniki Universitetinin titanmaqnetit filizi və tullantılardan vanadiumun çıxarılması üzrə kompleks metodların işlənməsi layihəsi, Sumqayıt Dövlət Universiteti ilə həmin universitetin alternativ enerji mənbələrinin enerji saxlama sistemləri ilə optimal idarəetmə alqoritmlərinin hazırlanması layihəsi qaliblər sırasında yer alıb. Bununla yanaşı, Azərbaycan Dövlət Neft və Sənaye Universiteti ilə Qarşı Dövlət Texniki Universitetinin fərdi istilik təchizatı üçün funksional kompozitlər əsasında polimer günəş kollektorlarının elmi əsaslandırılması layihəsi, Azərbaycan Texniki Universiteti ilə Cizax Politexnik Universitetinin nəqliyyat sisteminin optimallaşdırılması və şəhər mobilliyinin tədqiqi üçün proqram təminatının yaradılması layihəsi, eləcə də AR ETN Kimya İnstitutu PHŞ ilə Olmalıq Dövlət Texniki İnstitutunun oksidləşmiş və qarışıq mis filizlərinin emalı texnologiyalarına dair birgə araşdırması müsabiqənin qalibi elan edilib.