Azərbaycanlı tələbələr beynəlxalq yarışda uğur qazanıblar

Azərbaycanlı gənclər beynəlxalq “Caspian Hackathon 2026” yarışmasında uğur qazanıblar.

Direktor.az xəbər verir ki, Qazaxıstanın Aktau şəhərində təşkil olunan beynəlxalq texnologiya yarışmasında təmsilçilərimiz mühüm nailiyyət əldə ediblər. “Xəzər Dənizi Fəaliyyət Həftəsi 2026” çərçivəsində baş tutan turnirdə Azərbaycan tələbələrindən ibarət komanda üçüncü pilləyə layiq görülüb.

6–12 avqust tarixlərində keçirilən bu mötəbər yarışmada müxtəlif ali təhsil müəssisələrini təmsil edən 80-dən artıq komanda qələbə uğrunda yarışıb; final mərhələsində isə 30 fərqli komandanın tərkibində 80 iştirakçı mübarizəni davam etdirib. Qısa zaman çərçivəsində innovativ həllər və mürəkkəb layihələr ərsəyə gətirməli olan iştirakçılar arasında ölkəmizi birgə komanda təmsil edib.

Uğur qazanan heyətdə Azərbaycan Dövlət Neft və Sənaye Universitetinin BA Proqramlarının III kurs tələbəsi Muhəmməd Qasımov süni intellekt və maşın öyrənməsi üzrə mühəndis qismində çıxış edib. O, Bakı Ali Neft Məktəbinin üç tələbəsi ilə birgə çalışaraq təqdim olunan layihənin texniki infrastrukturunun və alqoritmlərinin qurulmasında əsas rol oynayıb.

Gərgin intellektual rəqabətin nəticəsi olaraq ADNSU və BANM gənclərinin qurduğu ortaq komandanın hazırladığı layihə münsiflər heyətinin yüksək qiymətini alaraq beynəlxalq hakatonun bürünc mükafatçısı olub.