Bu məktəbdə müəllimlər vahid formaya keçiblər

Cəbrayılın Horovlu kənd məktəbində müəllimlər vahid geyim formasına keçib

İşğaldan azad edilmiş Cəbrayıl rayonunun Horovlu kənd tam orta ümumtəhsil məktəbinin pedaqoji heyəti vahid geyim formasına keçib.

Direktor.az modern.az-a istinadla xəbər verir ki, 2026-cı il sentyabrın 15-də Horovlu kənd tam orta ümumtəhsil məktəbində 33 illik fasilədən sonra ilk dəfə “Bilik Günü” təntənə ilə qeyd olunub. Tədbir Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Məktəbin direktoru Zamiq Həmzəyev çıxış edərək şəhid ailələrini, qonaqları, müəllimləri və şagirdləri salamlayıb, yeni tədris ilinin start götürməsi münasibətilə təbriklərini çatdırıb. Direktor Horovluda 33 ildən sonra ilk zəngin çalınmasının müstəsna tarixi məna daşıdığını qeyd edərək şəhidlərimizə rəhmət, qazilərimizə şəfa, Ali Baş Komandana uğurlar arzulayıb. Daha sonra tədbirə qatılan şəhid ailələri və digər qonaqlar çıxış edərək məktəb kollektivini və şagirdləri təbrik ediblər. Mərasimin bədii hissəsində məktəblilərin ifasında şeirlər və rəqs nömrələri təqdim edilib, ardınca şagirdlər ilk dərs saatı üçün sinif otaqlarına daxil olublar.

Məlumat üçün bildirək ki, Horovlu kənd tam orta ümumtəhsil məktəbi işğaldan azad edilmiş yurd yerlərimizdə aparılan irimiqyaslı quruculuq tədbirləri çərçivəsində inşa olunub və 32 illik fasilənin ardından ilk dəfə 1 dekabr 2025-ci il tarixində istifadəyə verilib. Müasir təhsil tələblərinə tam cavab verən 624 şagird yerlik məktəbdə fəaliyyətə başladığı ilk günlərdə 103 şagird təhsil almağa cəlb olunub. Təhsil müəssisəsinin 20 nəfərə yaxın pedaqoji heyətini isə əsasən kəndin öz yerli sakinləri təşkil edir. İndiyədək Horovlu kəndinə 150-dən artıq ailə — ümumilikdə 600-dən çox sakin qayıdıb.