Çalışmanın yaş həddinə çatmış müəllimlərlə əmək münasibətləri necə tənzimlənməsi. ƏMR

Dövlət ümumi təhsil müəssisələrində çalışmanın yaş həddinə çatmış müəllimlərlə əmək münasibətlərinin tənzimlənməsi barədə

Dövlət ümumi təhsil müəssisələrində çalışmanın yaş həddinə çatmış müəllimlərlə əmək münasibətlərinin tənzimlənməsi mexanizminin təkmilləşdirilməsi məqsədilə Azərbaycan Respublikası Prezidentinin 2023-cü il 24 iyul tarixli 2242 nömrəli Fərmanı ilə təsdiq edilmiş “Azərbaycan Respublikasının Elm və Təhsil Nazirliyi haqqında Əsasnamə”nin 5.5.10-cu yarımbəndini rəhbər tutaraq

                                      əmr edirəm:

1.    Təhsil Nazirliyinin “Çalışmanın yaş həddinə çatmış dövlət ümumi təhsil müəssisələrinin müəllimləri ilə əmək münasibətlərinin tənzimlənməsi barədə” 28.07.2022-ci il tarixli F-467 nömrəli əmri qüvvədən düşmüş hesab edilsin.

2.    Dövlət ümumi təhsil müəssisələrində tədris ili ərzində çalışmanın yaş həddinə çatmış müəllimin həmin müəssisədə çalışma müddəti Azərbaycan Respublikasının Əmək Məcəlləsinin 10-1-ci maddəsinin tələbləri nəzərə alınmaqla ümumi təhsil müəssisəsinin rəhbərinin əmri ilə həmin tədris ilinin sonunadək uzadılsın.

3.    Dövlət ümumi təhsil müəssisələrində 3-cü sinifdə tədris aparan ibtidai sinif müəllimi çalışmanın yaş həddinə çatdıqda, həmin müəllimin çalışma müddəti Azərbaycan Respublikasının Əmək Məcəlləsinin 10-1-ci maddəsinin tələbləri nəzərə alınmaqla ümumi təhsil müəssisəsinin rəhbərinin əmri ilə 4-cü sinfin sonunadək uzadılsın.

4.    Bu əmrin 2-ci və 3-cü bəndlərində qeyd olunan hallar istisna olmaqla, çalışmanın yaş həddinə çatmış müəllimlərlə müəssisə rəhbəri tərəfindən yeni tədris ilində çalışma müddətinin uzadılması barədə qərar qəbul edilərkən Azərbaycan Respublikasının Əmək Məcəlləsinin 10-1-ci maddəsinin tələblərinə və aşağıdakı tələblərə riayət edilsin:

 4.1.müəllimin sertifikatlaşdırmanın test mərhələsində (sertifikatlaşdırma aparılmayan    fənlərə münasibətdə diaqnostik qiymətləndirmədə) azı 51 bal toplamış olması;

4.2. təhsil müəssisəsində fənn üzrə orta dərs yükünün 18 saatdan az olmaması.

5.    Azərbaycan Respublikasının Əmək Məcəlləsinin 58-ci maddəsinə əsasən və ya müəllimlərin işə qəbulu müsabiqəsində elan olunan vakansiya tutulmadıqda çalışmanın yaş həddinə çatmış müəllim ilə müddətli əmək müqaviləsinin bağlanılması zamanı həmin Məcəllənin 10-1-ci maddəsinin tələblərinə riayət edilsin.

6.    Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyi (Eşqi Bağırov) dövlət ümumi təhsil müəssisələrində çalışmanın yaş həddinə çatmış müəllimlərlə əmək münasibətlərinin tənzimlənməsi zamanı bu əmrin tələblərinə riayət edilməsinə nəzarəti təmin etsin.

7.    Elm və Təhsil Nazirliyi Aparatının Vətəndaşlara xidmət və sənədlərlə iş şöbəsi (Qorxmaz Əliyev) bu əmrin surətinin aidiyyəti üzrə çatdırılmasını təmin etsin.

8.    Əmrin icrasına nəzarət nazir müavini Həsən Həsənliyə həvalə edilsin.