İdman Akademiyası məktəblilərin fiziki sağlamlığı üçün layihə keçirir

Məktəblilərin fiziki sağlamlığını və hərəkət qabiliyyətini izləmək üçün “AZERFIT” layihəsi başladılıb.

Direktor.az xəbər verir ki, bu barədə İdman Akademiyası məlumat yayıb.

Gənclər və İdman Nazirliyi ilə Azərbaycan İdman Akademiyası uşaq və yeniyetmələrin sağlam böyüməsinə dəstək olmaq məqsədilə birgə “AZERFIT” layihəsini həyata keçirir.

Milli İdman Test Sisteminin tərkib hissəsi olan bu layihənin əsas məqsədi 9–15 yaşlı uşaqların boy-çəki kimi bədən quruluşu göstəricilərini və fiziki durumunu yoxlamaq, eləcə də onların inkişafını mütəmadi nəzarətdə saxlamaqdır.

Layihəyə hazırlıq məqsədilə son 6 ayda İdman Akademiyasında xüsusi işçi və səyyar komandalar yaradılıb, təlimlər keçirilib, məlumatlandırıcı kitabçalar hazırlanıb və zəruri test avadanlıqları alınıb.

İlkin sınaq mərhələsində Uşaq-Gənclər İdman Məktəblərində oxuyan 9–15 yaşlı 488 şagird yoxlanışdan keçirilib. Şagirdlərə 10 fərqli fiziki hərəkət və test tapşırığı verilib. Bu testlər vasitəsilə uşaqların gücü, dözümlülüyü, elastikliyi, çevikliyi və bədən hərəkətlərini idarəetmə (koordinasiya) bacarıqları ölçülüb.

Toplanan bütün məlumatlar böyük bir bazada cəmlənir. Bu göstəricilərdən təkcə uşaqların fiziki vəziyyətini izləmək üçün deyil, həm də alimlərin elmi məqalə və tədqiqatlarında, uşaqların sağlam inkişafı üçün yeni və düzgün üsulların hazırlanmasında istifadə ediləcək.

Növbəti addım olaraq layihə çərçivəsində paytaxt Bakıdakı ümumtəhsil məktəblərində oxuyan şagirdlərin də fiziki göstəriciləri yoxlanılacaq.