Məktəb idarəçiləri üçün təlimlər: Qanunvericilik və təhsil siyasəti

Azərbaycan Respublikası Elm və Təhsil Nazirliyinin dəstəyi, eləcə də Azərbaycan Gənc Müəllimlər Assosiasiyasının (AGMA) təşkilatçılığı ilə “Lider Məktəb – Gələcəyin Təhsil Rəhbərləri üçün İnkişaf Akademiyası” layihəsi çərçivəsində təlim mərhələsinə start verilib.

Elm və Təhsil Nazirliyinin elan etdiyi “Elm və təhsil sahəsində ictimai təşəbbüslərin dəstəklənməsi” qrant müsabiqəsi əsasında gerçəkləşdirilən layihənin başlıca qayəsi sabahın məktəb idarəçilərinin peşəkarlıq və liderlik kompetensiyalarını artırmaq, idarəetmədə mütərəqqi və innovativ düşüncəli kadr potensialını formalaşdırmaqdır.

Təlim proqramının ilk modulu “Qanunvericilik və təhsil siyasəti” mövzusuna həsr olunub. Tədris prosesinə ekspert-təlimçi qismində Bakı şəhəri 263 nömrəli tam orta məktəbin təlim-tərbiyə işləri üzrə direktor müavini Səkinə Hüseynova cəlb edilib.

Respublikanın müxtəlif bölgələrindən seçilmiş 35 iştirakçının qatıldığı dərslər hibrid formatda aparılır. İştirakçıların bir qisminin distant şəkildə qoşulduğu bu model regionlardan olan pedaqoqların vahid akademik platformada toplaşaraq təcrübə mübadiləsi aparmasına əlverişli şərait yaradır.

İlk modul boyunca iştirakçılara milli təhsil qanunvericiliyinin əsas istiqamətləri, dövlət siyasətinin prioritetləri və məktəb idarəçiliyində hüquqi-normativ bazanın rolu dərindən izah edilib. Eyni zamanda, rəhbər şəxslərin gündəlik fəaliyyətində hüquqi tələblərə əməl olunması, əsaslandırılmış idarəetmə qərarlarının qəbulu və müasir yanaşmaların tətbiqi məsələləri müzakirəyə çıxarılıb, dinləyicilərin sualları cavablandırılıb.