Məktəbdə növbətçi təhsilverənin vəzifə TƏLİMATI (layihə)

(Məktəbdə növbətçi təhsilverənin vəzifə TƏLİMATI ____________ Regional Təhsil İdarəsinin ___________ rayon ________________________ məktəbinin Pedaqoji Şurasının _____________ tarixli _____№- li iclasının ____№-li Qərarı ilə qəbul edilmi və məktəb direktorunun ____________ tarixli ______№-li əmri ilə təsdiq edilmişdir )

1. Ümumi müddəalar

1.1. Növbətçi təhsilverən məktəb direktorunun əmri ilə təsdiq edilmiş növbətçilik qrafikinə əsasən təhsilverənlər sırasından müəyyən edilir.

1.2. Növbətçi təhsilverən növbətçilik müddətində öz fəaliyyətini məktəbdə müəyyən edilmiş növbətçilik qaydalarına uyğun qurur, operativ təşkilati məsələlər üzrə baş növbətçinin göstərişlərini rəhbər tutur və məktəb direktorunun müəyyən etdiyi daxili rejim tələblərinə əməl edir.

1.3. Növbətçi təhsilverən təhkim olunduğu nəzarət zonasında təhlükəsizliyin, nizam-intizamın, məktəbdaxili davranış qaydalarına əməl olunmasının və ümumi iş ahənginin qorunmasına nəzarət edən məsul şəxsdir.

1.4. Növbətçi təhsilverən fəaliyyətində Azərbaycan Respublikasının təhsil və əmək qanunvericiliyini, məktəbin Nizamnaməsini, Daxili İntizam Qaydalarını, məktəb üzrə növbətçilik haqqında əsasnaməni, təhlükəsizlik, yanğından mühafizə, sanitariya-gigiyena və əməyin mühafizəsi ilə bağlı daxili sənədləri, eləcə də bu Vəzifə Təlimatını rəhbər tutur.

1.5. Növbətçi təhsilverənin fəaliyyəti məktəbdə şagirdlərin təhlükəsiz hərəkətinin, ümumi davranış qaydalarına riayət olunmasının, riskli halların vaxtında aşkarlanmasının və baş vermiş hadisələr barədə operativ məlumatlandırmanın təmin edilməsinə xidmət edir.

1.6. Növbətçi təhsilverən öz fəaliyyətində peşə etikası, insan ləyaqətinə hörmət, qərəzsizlik, təmkin, diqqətlilik, məsuliyyət və operativlik prinsiplərinə əməl etməlidir.

1.7. Növbətçi təhsilverən üzrlü səbəbdən növbətçiliyi icra edə bilmədikdə bu barədə əvvəlcədən rəhbərliyi məlumatlandırmalı, onun əvəz olunması məktəb direktorunun və ya aidiyyəti məsul şəxsin göstərişi ilə həll edilməlidir.

2. İxtisas tələbləri

2.1. Növbətçi təhsilverən ali pedaqoji təhsili olan və ya pedaqoji fəaliyyət üçün müəyyən edilmiş ixtisas tələblərinə cavab verən işçilər sırasından təyin olunur.

2.2. Növbətçi təhsilverən məktəbin daxili iş rejimini, şagird davranış qaydalarını, təhlükəsizlik tələblərini və növbətçilik sisteminin təşkilini praktik şəkildə tətbiq edə bilməlidir.

2.3. Növbətçi təhsilverəndə müşahidə aparmaq, riski vaxtında müəyyən etmək, vəziyyəti düzgün qiymətləndirmək, şagirdlərlə pedaqoji yanaşma ilə işləmək, gərgin hallarda təmkinli davranmaq və operativ məlumat vermək bacarığı olmalıdır.

3. Növbətçi təhsilverən bilməlidir

3.1. Məktəbin daxili intizam qaydalarını, şagird davranışına dair tələbləri və məktəbdaxili rejim qaydalarını.

3.2. Növbətçilik qrafikini, təhkim olunduğu nəzarət zonasını, həmin zonada nəzarət edilməli əsas risk sahələrini və operativ məlumatlandırma qaydasını.

3.3. Təhlükəsizlik, yanğından mühafizə, təxliyə, sanitariya-gigiyena və əməyin mühafizəsi üzrə məktəbdaxili tələbləri.

3.4. Şagirdin dərs vaxtı məktəbi tərk etməsi, kənar şəxslərin məktəb ərazisində hərəkəti, xəsarət və ya səhhət problemi ilə bağlı hallarda görülməli ilkin tədbirləri.

3.5. Məktəbdə riskli davranış, intizam pozuntusu, mübahisə, sıxlıq, dava-dalaş və digər gərgin situasiyalara pedaqoji və təhlükəsiz yanaşma qaydasını.

3.6. Baş növbətçi, sinif rəhbəri, psixoloq, tibb işçisi, mühafizə xidməti və rəhbərliklə qarşılıqlı fəaliyyət ardıcıllığını.

3.7. Zəruri hallarda növbətçilik jurnalı, qısa məlumat, hadisə qeydi və digər operativ sənədləşmə formalarının tərtibi qaydasını.

4. Vəzifə öhdəlikləri

4.1. Növbətçiliyin başlanması

4.1.1. Növbətçi təhsilverən növbətçiliyə dərslər başlamazdan əvvəl, məktəbdaxili qrafikdə müəyyən edilmiş vaxtda gəlir və təhkim olunduğu nəzarət zonasını qəbul edir.

4.1.2. Nəzarət zonasının təhlükəsizlik, səliqə-sahman və ümumi istifadəyə yararlılıq vəziyyətini ilkin olaraq yoxlayır.

4.1.3. Dəhliz, pilləkən, giriş hissəsi, siniflərə yaxın ümumi sahələr, sanitar qovşaq ətrafı və digər aid zonalarda risk yaradan hal aşkar etdikdə bu barədə dərhal baş növbətçiyə məlumat verir.

4.1.4. Təhkim edildiyi zonada növbətçilik zamanı nəzarətin fasiləsiz və məqsədyönlü həyata keçirilməsini təmin edir.

4.2. Dərs və tənəffüslər zamanı nəzarət

4.2.1. Tənəffüslər zamanı təhkim edildiyi zonada şagirdlərin təhlükəsiz hərəkətinə, nizam-intizam qaydalarına və məktəbdaxili davranış tələblərinə əməl olunmasına nəzarət edir.

4.2.2. Qaçış, itələşmə, sıxlıq, səs-küy, mübahisə, dava-dalaş və digər riskli davranışların qarşısının alınması üçün operativ və pedaqoji müdaxilə edir.

4.2.3. Şagirdləri təhlükəli yerlərdə dayanmaqdan, pilləkənlərdə və dəhlizlərdə riskli davranışdan, məktəb əmlakına zərər vuran hərəkətlərdən çəkindirir.

4.2.4. Ümumi istifadədə olan sahələrdə səliqə-sahmanın qorunmasına, məktəb əmlakının məqsədyönlü istifadəsinə və zədələnməsinin qarşısının alınmasına nəzarət edir.

4.2.5. Təhkim olunduğu zonada sanitar-gigiyenik vəziyyətdə problem və ya çatışmazlıq müşahidə etdikdə bu barədə baş növbətçiyə məlumat verir.

4.2.6. Dərs vaxtı şagirdlərin icazəsiz şəkildə sinfi, korpusu və ya məktəb ərazisini tərk etməsinə yol vermir, belə hal aşkar etdikdə dərhal baş növbətçini məlumatlandırır.

4.2.7. Dərs prosesinin pozulmasına səbəb olan halları, kənar müdaxiləni və ya məktəbdaxili rejimə zidd davranışı vaxtında müəyyən edir və operativ qaydada aidiyyəti şəxsə çatdırır.

4.3. Giriş-çıxış rejimi və kənar hallar üzrə fəaliyyət

4.3.1. Təhkim olunduğu zonada şagirdlərin, işçilərin və digər şəxslərin hərəkətində müəyyən edilmiş qaydalara əməl olunmasına nəzarət edir.

4.3.2. Kənar şəxsin məktəb ərazisində və ya nəzarət zonasında müşayiətsiz və ya şübhəli hərəkətini aşkar etdikdə dərhal baş növbətçiyə və zərurət olduqda mühafizə xidmətinə məlumat verir.

4.3.3. Məktəbdaxili rejimə uyğun olmayan davranış, sözlü münaqişə və ya gərginlik müşahidə etdikdə vəziyyətin böyüməsinin qarşısını almağa çalışır, hadisəni operativ qaydada baş növbətçiyə çatdırır.

4.4. Risk, xəsarət və fövqəladə hallarda ilkin fəaliyyət

4.4.1. Təhkim olunduğu zonada baş vermiş riskli vəziyyəti vaxtında aşkarlayır və təhlükənin genişlənməsinin qarşısını almaq üçün ilkin tədbir görür.

4.4.2. Şagird və ya işçidə xəsarət, qəfil səhhət problemi və ya təhlükəli vəziyyət yarandıqda ilk növbədə ətrafın təhlükəsizliyini təmin edir, dərhal baş növbətçini, zərurət olduqda tibb işçisini və rəhbərliyi məlumatlandırır.

4.4.3. Fövqəladə hal və ya təxliyə zərurəti yarandıqda məktəb üzrə müəyyən edilmiş təhlükəsizlik qaydalarına uyğun hərəkət edir və baş növbətçinin göstərişlərini rəhbər tutur.

4.4.4. Şagirdlərə qarşı fiziki və ya psixoloji zorakılıq, təhqir, təhdid və ya digər qəbuledilməz davranış halları müşahidə etdikdə dərhal reaksiya verir, vəziyyətin dayandırılması üçün tədbir görür və aidiyyəti şəxsləri məlumatlandırır.

4.5. Növbətçiliyin yekunlaşdırılması

4.5.1. Növbətçilik müddətinin sonunda təhkim olunduğu nəzarət zonasının ümumi vəziyyətini yoxlayır və növbətçiliyi müəyyən olunmuş qaydada başa çatdırır.

4.5.2. Gün ərzində müşahidə olunmuş hallar, aşkar edilmiş nöqsanlar və görülmüş tədbirlər barədə baş növbətçiyə qısa və dəqiq məlumat verir.

4.5.3. Zəruri hallarda baş növbətçinin göstərişi ilə qısa yazılı qeyd, məlumat və ya izahat xarakterli operativ arayış təqdim edir.

4.5.4. Növbətçiliklə bağlı sənədləşmə zamanı verilən məlumatların düzgün, obyektiv və faktlara əsaslanan şəkildə təqdim olunmasına riayət edir.

5. Hüquqları

5.1. Təhkim olunduğu nəzarət zonasında şagirdlərdən və digər aidiyyəti şəxslərdən məktəbdaxili intizam və təhlükəsizlik qaydalarına əməl etməyi tələb etmək.

5.2. Risk yaradan və ya təhlükəsizliyə zidd halların qarşısının alınması məqsədilə səlahiyyəti daxilində operativ və pedaqoji müdaxilə etmək.

5.3. Məktəbdaxili rejimin pozulması, təhlükəli vəziyyət, nasazlıq, nizam-intizam problemi və digər mühüm hal barədə baş növbətçiyə, zərurət olduqda rəhbərliyə məlumat vermək və məsələ qaldırmaq.

5.4. Növbətçilik zonasının təhlükəsizliyi və iş ahəngi ilə bağlı çatışmazlıqların aradan qaldırılması üçün baş növbətçiyə təklif vermək.

5.5. Zəruri hallarda sinif rəhbərinin, psixoloqun, tibb işçisinin, texniki heyətin və ya digər aidiyyəti şəxsin cəlb olunmasını baş növbətçi qarşısında qaldırmaq.

5.6. Nümunəvi davranışın həvəsləndirilməsi, problemli halların profilaktik qaydada həll edilməsi və əlavə nəzarət tədbirlərinin görülməsi ilə bağlı rəy bildirmək.

6. Məsuliyyəti

6.1. Növbətçi təhsilverən təhkim olunduğu nəzarət zonasında təhlükəsizliyin, nizam-intizamın və məktəbdaxili davranış qaydalarına əməl olunmasının lazımi səviyyədə təmin edilməməsinə görə məsuliyyət daşıyır.

6.2. Bu Vəzifə Təlimatında nəzərdə tutulmuş vəzifələri yerinə yetirmədikdə və ya lazımınca yerinə yetirmədikdə əmək qanunvericiliyinə, məktəbin daxili intizam qaydalarına və digər aidiyyəti normativ sənədlərə uyğun məsuliyyət daşıyır.

6.3. Riskli vəziyyət, xəsarət, intizam pozuntusu, nasazlıq və ya digər mühüm hal barədə məlumatı vaxtında çatdırmadıqda, yaxud hadisəyə laqeyd yanaşdıqda məsuliyyət daşıyır.

6.4. Şagirdlərə və ya işçilərə qarşı fiziki, psixoloji və ya etik normalara zidd davranışa yol verdikdə qanunvericiliyə uyğun məsuliyyət daşıyır.

6.5. Vəzifə səlahiyyətlərini aşdıqda, qərəzli münasibət göstərdikdə, təhsilverən nüfuzuna və peşə etikasına zidd davranış nümayiş etdirdikdə məsuliyyət daşıyır.

7. Qarşılıqlı fəaliyyət

7.1. Növbətçi təhsilverən öz fəaliyyətini baş növbətçi ilə operativ əlaqə şəraitində qurur və növbətçiliklə bağlı göstərişləri vaxtında icra edir.

7.2. Şagird davranışı, intizam pozuntusu və digər pedaqoji hallarla bağlı sinif rəhbərləri və aidiyyəti təhsilverənlərlə qarşılıqlı işləyir.

7.3. Şagirdin psixoloji vəziyyəti, emosional gərginlik, münaqişə və ya xüsusi yanaşma tələb edən hallarda məktəb psixoloqunun, zərurət olduqda rəhbərliyin diqqətini cəlb edir.

7.4. Xəsarət, səhhət problemi və ya sağlamlıqla bağlı vəziyyət yarandıqda tibb işçisi ilə, təhlükəsizlik və giriş-çıxış rejimi ilə bağlı hallarda mühafizə xidməti və aidiyyəti məsul şəxslərlə əlaqəli işləyir.

7.5. Məktəbdə sanitar vəziyyət, texniki çatışmazlıq və ya ümumi sahələrin istifadəsi ilə bağlı problem olduqda bu barədə baş növbətçi vasitəsilə aidiyyəti məsul şəxslərə məlumat verilməsini təmin edir.

7.6. Növbətçilik başa çatdıqda baş növbətçiyə ümumi vəziyyət, müşahidə edilmiş hallar və zəruri hesab edilən məsələlər barədə qısa məlumat təqdim edir.

8. Yekun müddəalar

8.1. Bu Vəzifə Təlimatı ____________________________________________ ümumi təhsil müəssisəsində növbətçi təhsilverənin fəaliyyətinin əsas vəzifə çərçivəsini müəyyən edir.

8.2. Bu Vəzifə Təlimatı məktəbin növbətçilik sistemi ilə bağlı digər daxili normativ sənədlərlə birlikdə tətbiq olunur və onlarla uzlaşdırılmış şəkildə icra edilir.

8.3. Bu Vəzifə Təlimatına dəyişiklik və əlavələr zərurət yarandıqda məktəbdaxili qaydalara uyğun qaydada edilir.

8.4. Bu Vəzifə Təlimatı məktəb direktorunun təsdiq etdiyi tarixdən qüvvəyə minir.

Təsdiq edirəm

Məktəb direktoru: ______________________________
İmza: ______________________________
Möhür

Təlimatla tanış oldum

Soyadı, adı, atasının adı: ______________________________
Vəzifəsi: ______________________________
İmza: ______________________________
Tarix: “” __________________ 20-ci il