Müsahibə sualları: 1. Şagird deyir: “Müəllim mənə qarşı qərəzli davranır.”

Müsahibə sualları : 1. Şagird deyir: “Müəllim mənə qarşı qərəzli davranır.”

Sual: Direktor ilk addımda nə etməlidir?

Şagird müəllimin ona qarşı qərəzli davrandığını deyirsə, direktorun ilk addımı məsələni dərhal hökm verməklə yox, sakit və ölçülü şəkildə araşdırmaq olmalıdır. Bu cür müraciət məktəbdə sadə bir narazılıq kimi qəbul edilməməlidir. Çünki şagird belə danışırsa, deməli, o, münasibətdə özünü incidilmiş, sıxılmış və ya ədalətsiz qiymətləndirilmiş hiss edir. Direktor əvvəlcə şagirdi ayrıca dinləməlidir. Uşağın sözünü kəsmədən, onu qorxuya salmadan danışdırmaq vacibdir. Ondan ümumi şikayət yox, konkret vəziyyət soruşulmalıdır. Hansı dərsdə, hansı hadisədə, hansı söz və ya davranışdan sonra belə düşündüyü aydınlaşdırılmalıdır.

Burada direktorun əsas işi şagirdi susdurmaq deyil, onu anlamaqdır. Uşaq hiss etməlidir ki, məktəbdə onun sözü eşidilir. Bundan sonra müəllim ayrıca dinlənilməlidir. Müəllimə də eyni sakitliklə yanaşmaq lazımdır. Bəzən müəllimin tələbkarlığı və intizam yaratmaq cəhdi şagird tərəfindən qərəz kimi qəbul olunur. Bəzən isə doğrudan da münasibətdə sərtlik, etiketləmə, müqayisə və ya haqsız yanaşma olur. Ona görə direktor təkcə eşitdiyi sözlə kifayətlənməməlidir. Tərəflərin dediklərini tutuşdurmalı, lazım gələrsə sinif rəhbərinin, psixoloqun və dərs müşahidəsinin imkanlarından istifadə etməlidir.

Psixoloji baxımdan bu məsələ çox həssasdır. Şagirdin qərəz hiss etməsi çox vaxt yalnız qiymət məsələsi olmur. Bu, bəzən qəbul olunmamaq, dəyərsiz görünmək və ya müəllimin yanında özünü narahat hiss etməkdən doğur. Direktor buna görə uşağın emosional vəziyyətini də nəzərə almalıdır. Eyni zamanda müəllimin peşəkar nüfuzu da qorunmalıdır. Məsələ elə idarə olunmalıdır ki, nə şagird özünü tək hiss etsin, nə də müəllim əvvəlcədən günahkar kimi təqdim olunsun.

Əgər araşdırma zamanı müəllimin münasibətində ədalətsizlik, kobudluq və ya etik çərçivədən kənar davranış görünərsə, direktor buna mütləq müdaxilə etməlidir. Bu müdaxilə cəza xatirinə yox, münasibətin düzəlməsi üçün edilməlidir. Müəllimlə peşəkar söhbət aparılmalı, şagirdlə münasibətin bərpası üçün praktik yol seçilməlidir. Yox əgər problem daha çox şagirdin hadisəni yanlış qavraması ilə bağlıdırsa, bu da ona sakit şəkildə izah edilməlidir. Direktorun birinci və ən doğru addımı budur: hər iki tərəfi ayrıca dinləmək, faktları toplamaq, tələsmədən nəticə çıxarmaq və məktəbdə ədalət hissini qorumaq. Məhz belə yanaşma həm şagirdi qoruyur, həm müəllimi, həm də məktəbin sağlam münasibət mühitini saxlayır.