Müsahibə sualı: 2. Şagird sinifdə ağlayır və dərsi tərk edir

Müsahibə sualları: 2. Şagird sinifdə ağlayır və dərsi tərk edir .

Sual: Müəllim necə davranmalıdır?

Şagird sinifdə ağlayıb dərsi tərk edirsə, müəllim ilk növbədə sakit qalmalıdır. Belə vəziyyətdə müəllimin ilk reaksiyası çox önəmlidir. Əgər müəllim əsəbiləşərsə, səsini qaldırarsa və ya uşağın ardınca irad bildirərsə, vəziyyət daha da ağırlaşa bilər. Uşaq həmin an artıq emosional gərginlik içindədir. Ona görə müəllim hadisəni intizam pozuntusu kimi deyil, yardım siqnalı kimi görməlidir. Əvvəlcə sinifdə sakitlik yaradılmalıdır. Digər şagirdlərin gülməsi, pıçıldaşması və hadisəni müzakirə etməsi dərhal dayandırılmalıdır. Sinfə qısa və təmkinli şəkildə vəziyyətin nəzarətdə olduğu hiss etdirilməlidir.

Bundan sonra müəllim şəraitə uyğun addım atmalıdır. Əgər şagirdin təhlükəsizliyi ilə bağlı ciddi risk yoxdursa, müəllim dərsi tam yarımçıq qoyub sinfi nəzarətsiz buraxmamalıdır. Amma uşaq çox ağır vəziyyətdədirsə, yaxınlıqda olan növbətçi müəllimdən, psixoloqdan və ya rəhbərlik nümayəndəsindən kömək istəmək lazımdır. Burada əsas məsələ həm sinfin idarəsini saxlamaq, həm də ağlayan uşağı tək buraxmamaqdır. Müəllim sonradan şagirdlə ayrıca danışmalıdır. Bu söhbət sinifin içində yox, sakit və təhlükəsiz bir mühitdə aparılmalıdır. Uşağa danışmaq üçün imkan verilməlidir. Ondan dərhal izahat tələb etmək yox, əvvəlcə özünü toparlamasına şərait yaratmaq daha doğrudur.

Müəllim söhbətə qınamaqla başlamamalıdır. Səni nə incitdi, özünü necə hiss edirsən, mən sənə necə kömək edə bilərəm kimi yanaşma daha doğru olar. Bu cür münasibət uşağın müəllimə olan etimadını qoruyur. Bəzən şagirdin ağlamasının səbəbi dərsdə baş verən bir hadisə olur. Bəzən də səbəb ailədəki gərginlik, sinifdaxili münasibət, özünəinam zəifliyi və ya yığılıb qalan daxili sıxıntı olur. Yəni görünən hadisənin arxasında daha dərin səbəb dayana bilər. Müəllim bunu nəzərə almalıdır. Uşağın həmin anda ən çox ehtiyac duyduğu şey danlaq yox, anlaşılmaqdır.

Əgər belə hal təkrarlanırsa, məsələ artıq təkcə müəllimlə şagird arasında qalmamalıdır. Məktəb psixoloqunun dəstəyi təşkil olunmalıdır. Lazım gələrsə sinif rəhbəri və valideyn də prosesə qoşulmalıdır. Amma bu addımlar uşağı damğalamaq üçün yox, ona dəstək vermək üçün atılmalıdır. Müəllimin əsas vəzifəsi uşağı dərhal geri qaytarmaq və ya sərt şəkildə intizama gətirmək deyil. Əsas məsələ onun emosional vəziyyətini anlamaq, təhlükəsiz mühit yaratmaq və yenidən sinfə sağlam şəkildə qayıdışına kömək etməkdir. Məktəbdə düzgün yanaşma budur: sakitlik, anlayış, ayrıca söhbət və ehtiyac varsa peşəkar dəstək. Bu zaman həm uşaq qorunur, həm sinif mühiti, həm də müəllimin nüfuzu.