Pedaqoji kollektivdə münaqişələr: II hissə. Yaranmış münaqişəni necə araşdırmaq, həll etmək və nəticəni yoxlamaq olar ?

"Məktəbdə münaqişələr və onların həlli yolları" kitabımdan.

Elşən Qafarov -Məktəbşünas

 İlk addım: vəziyyətin nə dərəcədə ciddi olduğunu müəyyən edin. Münaqişə barədə məlumat alan direktor əvvəlcə iki suala cavab tapmalıdır: hadisə kiminsə təhlükəsizliyi üçün risk yaradırmı və məktəbin işinə hazırda necə təsir edir? Tapşırığın yanlış başa düşülməsindən yaranan mübahisə ilə təhdid və ya fiziki təhlükə yaradan davranış eyni müdaxilə tələb etmir. Mübahisə hələ davam edirsə, ilk vəzifə onun şagirdlərin yanında və ya dərs zamanı böyüməsinin qarşısını almaqdır. Təhlükə olduqda əvvəlcə şagirdlərin təhlükəsizliyi təmin edilir, tərəflər bir-birindən ayrılır, vəziyyətə uyğun olaraq tibbi yardım və ya polis çağırılır. Bu ilkin tədbirlər kimin günahkar olduğu barədə qərar deyil. Onların məqsədi yalnız vəziyyəti sakitləşdirmək və təhlükəni aradan qaldırmaqdır. Təhqir və ya təhdid barədə məlumat şişirdilmiş və ya əhəmiyyətsiz sayılmamalıdır. O, yoxlanılmalı olan iddia kimi qeydə alınmalıdır. Hadisəni kiçik göstərmək üçün tərəfləri dərhal “barışın, bitsin” deyə çağırmaq real zərərin və təkrar riskin gözdən qaçmasına səbəb olur. İlkin qiymətləndirmədən sonra direktor müəyyən edir ki, məsələ təcili müdaxilə tələb edir, yoxsa planlı şəkildə aydınlaşdırıla bilər.