Şamaxıda məktəblilər “Əlaçı” verilişi üçün yarışıblar

Şamaxıda “Əlaçı” televiziya layihəsinin regional seçim turu təşkil olunub

İctimai TV-də yayımlanan “Əlaçı” intellektual televiziya layihəsinin yeni mövsümü üzrə regional seçim turlarına start verilib. Elm və Təhsil Nazirliyinin dəstəyi, Məktəbəqədər və Ümumi Təhsil üzrə Dövlət Agentliyi, İctimai TV və "Game TV"nin tərəfdaşlığı ilə reallaşan bilik yarışının növbəti mərhələsi Dağlıq Şirvan regionunda təşkil edilib.

Respublikanın bütün ümumtəhsil ocaqlarının X və XI sinif məktəbliləri üçün nəzərdə tutulan layihənin bölgə üzrə seçim turu 12 sentyabr 2026-cı il tarixində Şamaxı şəhər E. Hüseynov adına 2 nömrəli tam orta məktəbdə baş tutub.

İki mərhələli qrafik üzrə təşkil edilən intellektual sınaqda X siniflər saat 11:00-da, XI sinif şagirdləri isə saat 12:00-da biliklərini sınayıblar. Ümumilikdə 179 yuxarı sinif şagirdinin qatıldığı yarışmada region məktəblərindən 88 nəfər X sinif, 91 nəfər isə XI sinif şagirdi iştirak edib.

Seçim imtahanında yüksək göstərici əldə edərək fərqlənən məktəblilər cari tədris ilində layihənin Bakıda gerçəkləşəcək yeni mövsümünün televiziya çəkilişlərinə vəsiqə qazanacaqlar.