Məzunlar 22 ildən sonra görüşüblər

Mingəçevir Dövlət Universitetində məzunlar 22 ildən sonra bir araya gəliblər.

Direktor.az xəbər verir ki, bu barədə Mingəçevir Dövlət Universiteti (MDU) məlumat yayıb. Ali təhsil ənənələrinin davamlılığını qorumaq və məzunlarla əlaqələri möhkəmləndirmək məqsədilə yaddaqalan görüş reallaşıb. Görüş çərçivəsində 2000–2004-cü illərdə universitetdə “Nəqliyyat vasitələrinin texniki istismarı” ixtisası üzrə təhsil almış 170-ci qrupun tələbələri 22 illik fasilədən sonra yenidən doğma təhsil ocağında bir araya gəliblər.

Tədbir zamanı məzunlar vaxtilə dərs keçdikləri auditoriyaları və tədris binalarını gəzərək tələbəlik illərini böyük nostalji ilə xatırlayıblar. İllər öncə gələcək planlarının qurulduğu partalarda bu dəfə zəngin peşəkar təcrübəyə malik mütəxəssislər kimi əyləşən məzunlar unudulmaz xatirələrini bölüşüblər.

Görüşdə iştirakçılara universitetin ötən müddətdə keçdiyi inkişaf yolu, yenilənən tədris infrastrukturu və müasir təhsil imkanları barədə ətraflı məlumat verilib. Keçmiş tələbələr ali təhsil ocağında aparılan müasirləşmə addımlarını və formalaşan akademik mühiti yüksək qiymətləndiriblər.

Universitet təcrübəli məzunların potensialından cari tələbələrin inkişafında faydalanmağı və güclü məzun platformasının formalaşdırılmasını prioritet istiqamətlərdən biri kimi davam etdirir.