OYU-nun tələbələri Çində qızıl medallar qazanıblar

Odlar Yurdu Universitetinin magistrantları Çində keçirilən beynəlxalq sərgidə qızıl medallar qazanıblar 

Çin Xalq Respublikasının Quançjou şəhərində 30-dan çox dövlətin 3 700-dən artıq ixtira və texnoloji layihə ilə qatıldığı nüfuzlu XII Beynəlxalq İxtiralar Sərgisində (IEI 2026) Odlar Yurdu Universitetinin magistr tələbələri ölkəmizi uğurla təmsil edərək yüksək nailiyyətlərə imza atıblar. Tədbir çərçivəsində Nurlan Abdullayevin həmmüəllifi olduğu, süni intellekt əsaslı naviqasiya və kosmik müşahidə konsepsiyasını özündə birləşdirən "A.I.N.O.S" layihəsi qızıl medala layiq görülüb. Digər tərəfdən, Tuncay İsgəndərli və Nurlan Abdullayevin birgə hazırladıqları "Echron" layihəsi həm qızıl medal qazanıb, həm də sərginin təsis etdiyi "ALI & HOMA" xüsusi mükafatı ilə təltif edilib. Azərbaycan nümayəndə heyəti ümumi hesabda 4 qızıl, 4 gümüş, 1 bürünc medal və xüsusi mükafat əldə edərək mötəbər sərgini böyük zəfərlə başa vurub. Əldə olunan beynəlxalq uğur münasibətilə Odlar Yurdu Universitetinin rektoru, professor Əhməd Vəliyev gənc ixtiraçılar Nurlan Abdullayev və Tuncay İsgəndərlini, eləcə də onların elmi potensialının formalaşmasında əməyi keçən professor-müəllim heyətini təbrik edərək gələcək fəaliyyətlərində yeni nailiyyətlər arzulayıb.