Sinif rəhbərinin işinin səmərəliliyinin qiymətləndirilməsi. Situasiyalı testlər

“Mənim sinfim: 15 sentyabrdan son zəngə qədər”
V–IX siniflərin sinif rəhbərlərinə praktik dəstək — kitabımdan...
Elşən Qafarov, Məktəbşünas

 Qiymətləndirmə nə üçün lazımdır ? Sinif rəhbərinin əməyi gündəlik və çox vaxt səssiz aparılır, onun nəticəsi isə bir neçə aydan sonra üzə çıxır. Ona görə məktəb rəhbərliyi sinif rəhbərinin əməyinə aydın göstəricilər əsasında qiymət verməlidir. Qiymətləndirmənin məqsədi sinif rəhbərini cəzalandırmaq və ya tənqid etmək deyil, onun işində nəyin alındığını və nəyin dəyişməli olduğunu göstərməkdir. Şagird öz əməyinin görülməsini gözlədiyi kimi, sinif rəhbəri də yarımilin və tədris ilinin sonunda əməyinin ədalətlə qiymətləndirilməsini gözləyir. Qiymət verilməyən iş zamanla formal yerinə yetirilməyə başlayır. Səmərəlilik o deməkdir ki, sinif rəhbərinin gördüyü işlər şagirdlərdə real dəyişiklik yaradır. Çox tədbir keçirmək hələ səmərəli işləmək demək deyil. Əsas sualı belə qoyaq: il ərzində şagirdlərin davranışı, bir-birinə münasibəti, məktəbə marağı və məsuliyyəti necə dəyişib? Ona görə sentyabrda sinfin vəziyyəti qısa qeyd olunur ki, ilin sonunda müqayisə aparmaq mümkün olsun.