Sinif rəhbərinin ünsiyyət mədəniyyəti qaydaları. Real məktəb situasiyaları

  "Mənim sinfim: 15 sentyabrdan son zəngə qədər"
V–IX siniflərin sinif rəhbərinə praktik dəstək - kitabımdan...

Elşən Qafarov. Məktəbşünas 

Ünsiyyət mədəniyyəti nə üçün vacibdir. Sinif rəhbərinin şagirdlərlə münasibəti onun bilik və təcrübəsindən çox, necə danışmasından, necə dinləməsindən və sözünə necə əməl etməsindən asılıdır. Bir kobud cümlə, vaxtsız zarafat və ya verilib unudulmuş söz aylarla qurulan etimadı bir gündə pozur. Təhsil sahəsində qanunvericilik, o cümlədən Ümumi təhsil haqqında Qanun şagirdin şəxsiyyətinə və ləyaqətinə hörməti təmin edir, Müəllimlərin etik davranış qaydaları isə müəllimdən şagirdlə nəzakətli, ədalətli və təmkinli ünsiyyət tələb edir. Ümumi təhsilin dövlət standartları şagirddə ünsiyyət bacarıqlarının və başqasının fikrinə hörmətin formalaşdırılmasını nəzərdə tutur və bu bacarıqlar üçün ilk nümunə sinif rəhbərinin öz ünsiyyətidir. Aşağıdakı qaydalar bu tələblərin sinif rəhbərinin gündəlik işində necə görünməli olduğunu göstərir. Onlar şagirdlərlə işdə yarana biləcək səhvlərin və münaqişələrin qarşısını almağa kömək edir.