UNEC-də inklüziv mühit təşkil olunur

UNEC-də inklüziv təhsil mühiti tələbələrin yaradıcılıq və ictimai potensialını üzə çıxarır

Azərbaycan Dövlət İqtisad Universitetində (UNEC) inklüziv təhsilin inkişafı istiqamətində həyata keçirilən tədbirlər çərçivəsində əlilliyi olan gənclərin akademik hazırlığı ilə yanaşı, onların ictimai fəallığının və yaradıcılıq potensialının dəstəklənməsinə xüsusi önəm verilir. Universitet tərəfindən istedadlı tələbələrin qabiliyyətlərini nümayiş etdirmələri üçün müxtəlif layihə və təşəbbüslər reallaşdırılır.

Bu dəstək mexanizmləri çərçivəsində tələbələrin qələmə aldığı poeziya toplularının və detektiv janrlı romanların çap olunmasına, eləcə də onların geniş ictimaiyyətə tanıdılması məqsədilə təqdimat mərasimlərinin keçirilməsinə hərtərəfli şərait yaradılır. Eyni zamanda, təsviri sənətə marağı olan gənclərin rəsm əsərlərindən ibarət fərdi və ümumi sərgilər təşkil edilir ki, bu da onların bədii yaradıcılığının daha böyük auditoriya tərəfindən tanınmasına imkan yaradır.

İnklüziv mühitin mühüm tərkib hissəsi kimi əlilliyi olan tələbələrin ali təhsil ocağındakı tələbə təşkilatlarına fəal cəlb olunması təmin edilir. Bu yanaşma gənclərin sosial mühitə rəvan inteqrasiyasına, daxili inamlarının yüksəlməsinə və ictimai işlərdə aktiv təmsil olunmalarına güclü təkan verir. Tələbələr müxtəlif layihələrdə, maraqlı debat və tədbirlərdə, həmçinin könüllülük proqramlarında yaxından iştirak edərək həm komanda ilə işləmək, həm də liderlik bacarıqlarını uğurla inkişaf etdirirlər.