Sentyabr konfransı: Təhsildə yeni keyfiyyət standartları və hədəflər açıqlanıb

2026–2027-ci tədris ili üzrə təhsil işçilərinin sentyabr konfransı keçirilib. Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov hesabat məruzəsində bildirib ki, təhsil sahəsində keyfiyyət dəyişikliyi məlumatlara söykənən idarəetmə, müəllim peşəkarlığı və dövrün tələb etdiyi bacarıqların inkişafı ilə sıx bağlıdır. Yeni tədris modellərinin tətbiqi sayəsində müsbət dinamikanın formalaşdığını deyən E.Bağırov keyfiyyətin yalnız aşağı göstəriciləri aradan qaldırmaq deyil, şagirdlərdə tənqidi və kreativ düşüncə, rəqəmsal savadlılıq, komanda işi və problem həlletmə kimi müasir vərdişləri aşılamaq anlamına gəldiyini diqqətə çatdırıb.

Təhsil İnstitutunun direktoru səlahiyyətlərini icra edən, nazir müşaviri Elnur Əliyev təqdimatında ibtidai və 6-cı siniflər üzrə qiymətləndirmə nəticələrindəki irəliləyişə toxunub. O, xüsusilə 4-cü sinif şagirdlərinin oxu və riyazi bacarıqlarında müşahidə olunan yüksəlişi, habelə baza səviyyəsindən geri qalan şagird sayının azalmasını tədrisdə minimum standartların təmin olunması istiqamətində uğurlu addım kimi dəyərləndirib.

Dövlət İmtahan Mərkəzinin İdarə Heyətinin sədri Məleykə Abbaszadə çıxışında təhsil göstəricilərinin quru rəqəmlərlə deyil, şagirdlərin fərdi potensialı və psixometrik göstəriciləri nəzərə alınmaqla dərindən təhlil edilməli olduğunu vurğulayıb. M.Abbaszadə zəif nəticələrin kökündə duran amillərin ibtidai təhsil mərhələsindən aşkarlanmasının və hər bir şagirdin tələbatına uyğun dəstək mexanizminin qurulmasının vacibliyini önə çəkib.

Yekun nitqi ilə çıxış edən elm və təhsil naziri Emin Əmrullayev təhsilin əsas meyarının şagirdin öyrənmə nəticələri olduğunu xatırladıb. Nazir bütün qərar və layihələrin dərin təhlilə, elmi araşdırmalara və faktiki məlumatlara söykənməsinin, effektiv təcrübələrin isə davamlı icrasının vacibliyini qeyd edib. Məktəbdaxili qiymətləndirmələrin təkmilləşdirilməsi və vahid metodologiyanın tətbiqinin zəruriliyini vurğulayan E.Əmrullayev məktəb-valideyn-icma əməkdaşlığının əhəmiyyətini qeyd edib, həmçinin tədrisin başlıca qüvvəsi olan müəllimlərin müasir metodoloji alətlərlə təmin olunmasının prioritet olduğunu bildirib. 

Konfransın yekununda açıq mikrofon formatında müzakirələr aparılıb, iştirakçıların rəy və təklifləri cavablandırılıb.