UNEC qlobal reytinqdəki mövqeyində irəliləyiş edib

Azərbaycan Dövlət İqtisad Universiteti dünyanın nüfuzlu ali təhsil reytinqlərindən olan "Times Higher Education World University Rankings"in ən son hesabatında nəzərəçarpacaq sıçrayış edib. Təhsil ocağının qazandığı uğurlar xüsusilə elmi tədqiqatların keyfiyyəti və qlobal miqyasda inteqrasiya istiqamətlərində özünü qabarıq göstərir.

Elmi araşdırmalarda 158 pilləlik yüksəliş

Universitetin builki reytinq cədvəlində ən parlaq nəticəsi "Tədqiqatın keyfiyyəti" (Research Quality) parametri üzrə qeydə alınıb. Ötən illə müqayisədə bir anda 158 pillə irəliləyən UNEC dünya miqyasında 323-cü pilləyə yüksəlib. Bu istiqamətdəki dinamikanı təmin edən mühüm faktorlar sırasına istinad təsiri (Citation Impact – 97.7), tədqiqat gücü (Research Strength – 96.9) və tədqiqat mükəmməlliyi (Research Excellence – 64.4) daxildir. Həmin göstəricilər UNEC-in akademik araşdırmalarının dünya elmindəki çəkisini və effektivliyini birbaşa əks etdirir.

Beynəlmiləlləşmə göstəricisində rekord artım: 276 pillə irəli

UNEC-in qlobal arenada rəqabətədavamlılığını nümayiş etdirən digər mühüm meyar "Beynəlmiləlləşmə" (International Outlook) indikatorudur. Bu bölmədə universitet 276 pillə sıçrayaraq qlobal miqyasda 376-cı mövqeyə çatıb. Uğurlu dinamikanın əsasında beynəlxalq birgə müəlliflik (85.6 bal), xarici professor-müəllim heyətinin cəlbi (84.0 bal) və əcnəbi tələbə kontingenti (54.5 bal) amilləri dayanır. Universitetdə xarici əməkdaşların və təhsilalanların xüsusi çəkisinin artması ümumi nəticəyə müsbət təsir göstərib.

Qlobal orta göstəricilər arxada qaldı

UNEC-in əldə etdiyi göstəricilər dünya üzrə ümumi median dəyərlərindən nəzərəçarpacaq dərəcədə yüksək olub:

Tədqiqatın keyfiyyəti: Dünya medianını 27.1 bal qabaqlayır;

Beynəlmiləlləşmə: Dünya medianından 29.8 bal yüksəkdir.

Bununla yanaşı, universitet təkcə bu iki meyarlarla kifayətlənməyib, "Tədris" (Teaching) və "Tədqiqat mühiti" (Research Environment) istiqamətlərində də öz göstəricilərini əhəmiyyətli dərəcədə yaxşılaşdırmağa nail olub.

Reytinqin qiymətləndirmə mexanizmi

THE WUR ali məktəbləri ümumilikdə beş fərqli parametr üzrə qiymətləndirir:

Tədqiqatın keyfiyyəti: 30%

Tədris: 29.5%

Tədqiqat mühiti: 29%

Beynəlmiləlləşmə: 7.5%

Sənaye tərəfdaşlığı: 4%

Qiymətləndirmə strukturunda elmi fəaliyyət və tədrisin ən yüksək çəkiyə malik olduğunu nəzərə alsaq, THE WUR 2027 nəticələri UNEC-in məhz qlobal elmi arenadakı nüfuzunun və təhsil standartlarının keyfiyyətcə yeni mərhələyə qədəm qoyduğunu təsdiqləyir.