UNEC tələbələri üçün təqaüd və iş imkanı yaradılır

UNEC və “PAŞA Kapital” maliyyə sahəsində gənc mütəxəssislərin yetişdirilməsi üçün tərəfdaşlığa başlayıb.

Azərbaycan Dövlət İqtisad Universiteti (UNEC) ilə investisiya sahəsinin aparıcı təmsilçilərindən olan “PAŞA Kapital İnvestisiya Şirkəti” QSC arasında institusional tərəfdaşlığın təməli qoyulub. Şirkətin Baş İcraçı direktoru İsi Mustafayevin rəhbərlik etdiyi nümayəndə heyətinin ali məktəbə səfəri çərçivəsində rektor Ədalət Muradov və rəhbər heyətin iştirakı ilə görüş keçirilib. Görüş zamanı ali təhsil məkanının real biznes sektoru ilə sıx inteqrasiyasının və sistemli kommunikasiyanın zəruriliyi vurğulanıb, qurulacaq əməkdaşlığın gənclərin kapital bazarları üzrə peşəkar bacarıqlarını formalaşdırmaqla onları əmək bazarına tam hazır vəziyyətə gətirəcəyi bildirilib. Görüşün sonunda tərəflər arasında gələcək fəaliyyət istiqamətlərini hüquqi cəhətdən rəsmiləşdirən əməkdaşlıq memorandumu imzalanıb. Razılaşmaya əsasən, universitetin müvafiq fakültələrində təhsil alan bakalavr və magistrantları üçün investisiya şirkətində təcrübə proqramları həyata keçiriləcək, mütəxəssislərin iştirakı ilə seminar və ustad dərsləri təşkil olunacaq. Bununla yanaşı, tələbələrə təhsil dövründə xüsusi təqaüdlərin verilməsi, məzunların məşğulluq və karyera perspektivlərinə dəstək göstərilməsi, ali təhsil ocağında müasir avadanlıqlarla təchiz edilmiş ixtisaslaşmış laboratoriyanın qurulması və istehsalat təcrübəsinin təşkili planlaşdırılır. Qurumlar, eyni zamanda, cəmiyyətdə maliyyə savadlılığının təşviqi və birgə korporativ sosial məsuliyyət layihələrinin icrası istiqamətində də fəaliyyətlərini əlaqələndirəcəklər.