Universitet və kolleclərə elektron qeydiyyat müddəti açıqlanıb

Universitet və kolleclərə qəbul olan tələbələrin elektron qeydiyyat müddəti və qaydaları açıqlanıb

Ali təhsil müəssisələrinin vakant qalan yerlərinə (II tur) və 11 illik baza üzrə kolleclərə qəbul hüququ qazanan abituriyentlərin qeydiyyat prosesi aktiv şəkildə davam edir. Tələbə adını qazanan şəxslər qeydiyyatlarını "myGov" portalı vasitəsilə həyata keçirməlidirlər.

Bu mərhələ üzrə qeydiyyat üçün son tarix 17 sentyabr saat 23:59 olaraq müəyyən edilib. Göstərilən vaxtadək müraciətini rəsmiləşdirməyən abituriyentlər qəbul olunduqları təhsil ocağından imtina etmiş sayılacaqlar.

Bununla yanaşı, Elm və Təhsil Nazirliyinin "myGov" platforması üzərindən təqdim etdiyi xidmət vasitəsilə 9 illik baza üzrə orta ixtisas təhsili müəssisələrinə qəbul olanların da sənədləşmə prosesi start götürür. Bu qrup üzrə qeydiyyat 15 sentyabr saat 15:00-da başlayacaq və 22 sentyabr saat 18:00-dək "my.gov.az" elektron ünvanında davam edəcək.