Universitetlərdə əcnəbilər üçün təhsil haqqı təqaüdlər nə qədərdir?

Azərbaycan universitetlərində əcnəbi tələbələr üçün təhsil haqları və təqaüd imkanları açıqlanıb.

Direktor.az modern.az-a istinadla xəbər verir ki, ali təhsil müəssisələrində əcnəbi vətəndaşların təhsil haqları seçilən ixtisas və universitetdən asılı olaraq fərqlənir. Bəzi universitetlərdə yerli və əcnəbi tələbələrə vahid tarif tətbiq edildiyi halda, digər təhsil ocaqlarında xarici vətəndaşlar üçün fərqli ödəniş sistemi və təqaüd mexanizmləri müəyyənləşdirilib.

Universitetlər üzrə mövcud vəziyyət aşağıdakı kimidir:

• Azərbaycan Dövlət Pedaqoji Universiteti (ADPU): Bakalavriat pilləsində bütün ixtisaslar üzrə illik təhsil haqqı həm yerli, həm də xarici vətəndaşlar üçün eyni olub 2400 manatdır. Regional filiallarda illik ödəniş 2100 manat, magistratura proqramlarında 2400 manat, MBA ixtisaslaşmalarında isə 3000 manat təşkil edir. Əcnəbi təhsilalanlar üçün xüsusi və ya dövlət təqaüdü nəzərdə tutulmayıb.

• Azərbaycan Dövlət Rəssamlıq Akademiyası (AzRA): Hazırlıq mərhələsinin illik ödənişi 1200 manat, bakalavriat və magistratura pillələri üzrə isə ixtisasdan asılı olaraq 1900–2900 manat aralığındadır. Rəsmi təqaüd proqramı olmasa da, sponsor dəstəyi ilə yüksək nəticə göstərən bir neçə xarici tələbəyə aylıq 100 manat civarında təqaüd ayrılır, sərgi və müsabiqə qalibləri isə birdəfəlik pul mükafatları qazana bilirlər.

• Xəzər Universiteti: Əcnəbilər üçün illik təhsil haqqı əksər ixtisaslarda 5000 ABŞ dolları, 5 illik tədris müddəti olan Baytarlıq fakültəsində isə 6000 ABŞ dolları səviyyəsində müəyyən edilib. Ali məktəbdə xarici vətəndaşlar üçün 25%, 50% və 75%-lik güzəştli burslar, eləcə də qız tələbələrə yönəlmiş ayrıca təqaüd imkanları mövcuddur.

• Azərbaycan Universiteti: Bakalavriat proqramlarında illik ödəniş 2550 manat, magistraturada 3440 manat, Azərbaycan dili hazırlıq kursunda isə 1550 manat təşkil edir. Əcnəbilər üçün ayrıca təqaüd nəzərdə tutulmayıb.

• Azərbaycan Dövlət İqtisad Universiteti (UNEC): Əcnəbi və yerli tələbələr eyni tariflə təhsil alırlar. Bakalavriat pilləsində təhsil haqqı 1600–2600 manat, magistraturada ixtisas magistrləri (MS) üzrə 2000–2300 manat, MBA proqramlarında isə 3000–4500 manat arasındadır. Xarici tələbələrə ayrıca təqaüd imkanı təklif edilmir.

• ADA Universiteti: Təhsil haqları ixtisaslara görə dəyişir; bakalavriat üzrə illik baza məbləği 8500 manat, magistratura pilləsində əksər sahələr üzrə 10 500 manatdır. Bəzi informasiya texnologiyaları və mühəndislik magistr proqramlarında isə ödəniş 36 200 ABŞ dollarına çatır. Universitetdə xarici vətəndaşlar üçün müxtəlif maliyyə güzəştləri və təqaüd paketləri tətbiq olunur.

• Dövlət İdarəçilik Akademiyası (DİA): Ali təhsil müəssisəsində hazırda əcnəbi tələbə təhsil almır.