Dərs müşahidəsi və inkişafyönümlü geribildirim (əks-əlaqə) Situasiyalı testlər

Dərs müşahidəsinin mahiyyəti və məqsədi. Dərs müşahidəsi müəllimin və şagirdlərin dərs zamanı fəaliyyətini əvvəlcədən müəyyən edilmiş məqsəd və meyarlar əsasında izləmək, faktları qeydə almaq və tədrisin inkişafına xidmət edən qərarlar hazırlamaq prosesidir. Onun əsas məqsədi müəllimdə nöqsan axtarmaq deyil, təlimin real vəziyyətini öyrənmək, güclü tərəfləri müəyyənləşdirmək və inkişaf ehtiyacına uyğun dəstək göstərməkdir. Azərbaycan məktəb təcrübəsində “dərsdinləmə” və “dərs müşahidəsi” anlayışları çox vaxt eyni mənada işlədilir. Dərsdinləmə daha çox məktəbdə formalaşmış ənənəvi anlayışdır, dərs müşahidəsi isə məqsədin, fokus meyarlarının, faktoloji qeydlərin və sonrakı inkişaf addımlarının önə çəkildiyi daha sistemli yanaşmanı ifadə edir. İnkişafyönümlü müşahidə müəllimin peşəkar inkişafına, şagirdlərin öyrənməsinə və məktəbdə tədrisin keyfiyyətinin yüksəldilməsinə xidmət etməlidir. Bununla yanaşı, məktəb rəhbərliyi öz səlahiyyəti daxilində tədrisin vəziyyətini öyrənmək, proqramların icrasını izləmək və idarəetmə qərarlarını əsaslandırmaq məqsədilə nəzarət xarakterli müşahidə də apara bilər. Buna görə müşahidənin məqsədi, tətbiq ediləcək prosedur və nəticələrdən necə istifadə olunacağı əvvəlcədən aydın müəyyənləşdirilməlidir.