DİQQƏT! Məktəbiniz üçün MİP hazırlatmaq istəyirsiniz ? OXUYUN !

   Hörmətli məktəb direktorları.

Məktəbin inkişafının sistemli, məqsədyönlü və nəticəyönlü şəkildə qurulması üçün planlaşdırma sənədlərinin düzgün hazırlanması mühüm əhəmiyyət daşıyır. Məktəbin İnkişaf Planı məktəbin mövcud vəziyyətinin təhlili, prioritet istiqamətlərin müəyyən edilməsi, məqsəd və vəzifələrin düzgün qurulması, resursların səmərəli planlaşdırılması və fəaliyyətin ardıcıl izlənilməsi baxımından əsas idarəetmə sənədidir. Bu sənədə uyğun hazırlanan Perspektiv Plan, İllik Fəaliyyət Planı və Məktəbdaxili Nəzarət Planı isə məktəbin gündəlik və uzunmüddətli fəaliyyətinin vahid məntiq üzrə təşkili üçün vacibdir.

Rəhbərlik etdiyiniz təhsil müəssisəsi üçün Məktəbin İnkişaf Planının, həmin plana uyğun Perspektiv Planın, İllik Fəaliyyət Planının və illik Məktəbdaxili Nəzarət Planının hazırlanmasına ehtiyacınız varsa, 050 672 59 11 nömrəsi ilə əlaqə saxlaya bilərsiniz. Məktəb tərəfindən zəruri məlumatlar təqdim edildikdən sonra həmin sənədlər məktəbin real vəziyyətinə, ehtiyaclarına və inkişaf istiqamətlərinə uyğun şəkildə hazırlanaraq sizə təqdim edilə bilər.

Hazırlanan sənədlərdə məktəbin mövcud vəziyyətinin təhlili, akademik nəticələr, risk sahələri, kadr və resurs imkanları, idarəetmə ehtiyacları, monitorinq mexanizmləri və icra istiqamətləri nəzərə alınır. Məqsəd məktəb üçün formal deyil, praktik istifadəyə yararlı, məktəbin işini istiqamətləndirən və rəhbərliyə dayaq olan plan sənədləri hazırlamaqdır.

Əlaqə üçün: 050 672 59 11

Hörmətlə, Elşən Qafarov

MİP üçün tələb olunan məlumatlar

Məktəbin 3 illik İnkişaf Planının keyfiyyətli, real vəziyyətə uyğun və icraolunan şəkildə hazırlanması üçün məktəb üzrə zəruri məlumatların mərhələli qaydada toplanması məqsədəuyğundur. Bu yanaşma məktəbin mövcud vəziyyətinin düzgün diaqnostika olunmasına, prioritetlərin əsaslandırılmış şəkildə müəyyən edilməsinə və tədbirlərin real imkanlar çərçivəsində planlaşdırılmasına şərait yaradır.

Bu məqsədlə məlumatların aşağıdakı 3 mərhələ üzrə təqdim edilməsi xahiş olunur.

I MƏRHƏLƏ. İlkin diaqnostika və baza göstəriciləri (bu mərhələ son 2-3 ilin məlumatları əsasında hazırlanır)

Bu mərhələdə məktəbin ümumi mənzərəsini və tədris nəticələrinin ilkin vəziyyətini görmək üçün əsas məlumatlar təqdim olunmalıdır.

  Salam hörmətli _____________ müəllim.

Məktəbin İnkişaf Planının hazırlanmasının ilk mərhələsində aşağıda qeyd olunan məlumatların ən qısa zamanda mənə göndərilməsini xahiş edirəm. Bu məlumatlar məktəbin hazırkı vəziyyətinin ilkin diaqnostikasını aparmaq, əsas ehtiyacları müəyyənləşdirmək və sonrakı mərhələlərdə işi daha dəqiq qurmaq üçün lazımdır. Məlumatların mümkün qədər dəqiq, cədvəl və ya qısa arayış formasında təqdim olunması məqsədəuyğundur.

1.    Məktəbin ümumi pasport məlumatları
Məktəbin tam adı, məktəbin tipi, yerləşdiyi rayon, şəhər, qəsəbə və ya kənd, tədris dili və ya dilləri, növbə sayı, dərsin başlama saatı.

2.    Sinif komplektləri barədə məlumat
Sinif komplektlərinin ümumi sayı, paralellər üzrə komplekt siniflər, faktiki fəaliyyət göstərən sinif sayı. Məktəbdə məktəbəhazırlıq qrupları fəaliyyət göstərirsə, 5 yaşlılarla bağlı qrupların sayı və həmin qruplarda təhsil alan uşaqların sayı da ayrıca qeyd olunsun. Bu məlumatı ayrıca sətirdə vermək kifayətdir.

3.    Şagird kontingenti cədvəli
I–XI siniflər üzrə şagird sayı, qız və oğlan nisbəti, ümumi kontingent.

4.    Şagird axını barədə məlumat
İl ərzində məktəbə gələn şagirdlərin sayı, il ərzində məktəbdən ayrılan şagirdlərin sayı.

5.    Qonşu yaşayış məntəqələrindən gələn şagirdlər barədə məlumat
Qonşu kənd və ya qəsəbədən gələn şagirdlərin ümumi sayı.

6.    BSQ nəticələri cədvəli
Son 3 ilin müqayisəli göstəricisi təqdim olunsa daha məqsədəuyğun olar. V–IX siniflər üzrə, fənlər üzrə orta nəticə (hər sinif və hər fənn üzrə ayrıca sətir açın. Məsələn, V sinif – Azərbaycan dili, V sinif – riyaziyyat şəklində verin. Məlumatı mövcud BSQ cədvəllərindən və ya məktəbdə olan yekunlaşdırılmış nəticələrdən götürüb bir cədvəldə toplayın), minimum nəticəni keçənlərin payı (hər sinif və fənn üzrə minimum həddi keçən şagirdlərin sayını və faizini ayrıca yazın. Məktəbdə hansı keçid həddi qəbul olunubsa, həmin meyar üzrə hesablayın. Faizi də cədvəldə ayrıca sütunda göstərin).

7.    KSQ nəticələri cədvəli
Varsa son 1–2 il üzrə təqdim edilməsi məqsədəuyğundur. Siniflər və fənlər üzrə orta nəticələr (hər sinif və fənn üzrə ayrıca ümumiləşdirilmiş nəticə hazırlayın. Ayrı-ayrı şagird siyahısı göndərməyə ehtiyac yoxdur. Mövcud jurnal, elektron sistem və ya müəllimlərin yekun KSQ məlumatları əsasında ümumi cədvəl tərtib edin), dinamika (eyni sinif və fənn üzrə əvvəlki dövrlə sonrakı dövrü yanaşı göstərin. Məsələn, I yarımil və II yarımil və ya ötən il və bu il formasında təqdim edə bilərsiniz. Artım və azalma aydın görünsün).

8.    IV sinif üzrə baza nəticələri
Tədris dili üzrə nəticə (IV sinif üzrə mövcud yekun və ya monitorinq nəticəsini ayrıca göstərin. Cədvəldə fənnin adını və qarşısında ümumi nəticəni yazmaq kifayətdir), riyaziyyat üzrə nəticə (eyni qaydada riyaziyyat fənni üzrə nəticəni ayrıca təqdim edin. Mövcud sənəddə hansı formada varsa, həmin formada götürüb qısa cədvələ salın), varsa orta bal və ya düzgün cavab faizi (əgər nəticələr bal ilə çıxarılıbsa orta balı yazın, test və ya tapşırıq üzrə faizlə çıxarılıbsa düzgün cavab faizini göstərin. Hansı format məktəbdə hazırdırsa, onu göndərin. Əlavə hesablama aparmağa ehtiyac yoxdur).

9.    VI sinif üzrə nəticələr
Tədris dili, riyaziyyat, təbiət üzrə orta göstəricilər (bu 3 fənn üzrə ümumiləşdirilmiş nəticəni ayrıca təqdim edin. Hər fənn üçün bir sətir açın və qarşısında ümumi göstəricini yazın. Mümkünsə eyni cədvəldə verilməsi daha yaxşı olar).

10. IX sinif buraxılış nəticələri
Son 3 ilin müqayisəli göstəricisinin təqdim edilməsi məqsədəuyğundur. İştirakçı sayı, ümumi nəticə, fənlər üzrə nəticələr.

11. Buraxılış nəticələrinin bal aralıqları üzrə bölgüsü
Son 3 ilin müqayisəli göstəricisinin təqdim edilməsi məqsədəuyğundur. Mövcud bölgüyə əsasən, məsələn 100–199, 200–300 və sair.

12. İllik yekun nəticələr üzrə məlumat
Son 3 ilin müqayisəli göstəricisinin təqdim edilməsi məqsədəuyğundur. Siniflər üzrə illik qiyməti “2” olan şagirdlərin sayı, faiz göstəricisi (hər sinif üzrə “2” alan şagirdlərin sayını ayrıca yazın. Sonra həmin sinfin ümumi şagird sayına nisbətdə faizini hesablayıb ayrıca sütunda göstərin. Say və faiz yanaşı verilsə, müqayisə daha rahat aparılacaq).

13. Yay tapşırığı barədə cədvəl
Son 3 ilin müqayisəli göstəricisinin təqdim edilməsi məqsədəuyğundur. Siniflər üzrə yay tapşırığı alan şagird sayı, mümkünsə fənlər üzrə bölgü.

14. Məktəbdaxili monitorinq nəticələri
Cari tədris ili üzrə təqdim olunması kifayətdir. Məktəbdə aparılmış daxili monitorinqlər, sınaqlar və digər yoxlama işləri üzrə aylıq və ya dövrlük göstəricilər, qısa yekun nəticə.

15. Əsas fənlər üzrə zəif bacarıqlar siyahısı
Xüsusilə tədris dili və riyaziyyat üzrə məktəbin müəyyən etdiyi əsas öyrənmə boşluqları.

Qeyd: Birinci mərhələ üzrə məlumatlar əsasən məktəbin cari vəziyyətini əks etdirməlidir. Bu mərhələdə məqsəd məktəbin ümumi vəziyyətini, şagird kontingentini və əsas akademik nəticələrini ilkin diaqnostika üçün toplamaqdır. Buna görə 1-ci, 2-ci, 3-cü, 4-cü, 5-ci, 8-ci, 9-cu, 14-cü və 15-ci bəndlər üzrə məlumatların cari tədris ili və ya hazırkı vəziyyət üzrə təqdim olunması kifayətdir. 6-cı, 10-cu, 11-ci, 12-ci və 13-cü bəndlər üzrə məlumatların isə mümkün olduqda son 3 il üzrə müqayisəli təqdim edilməsi məqsədəuyğundur. 7-ci bənd üzrə məlumatlar mövcuddursa, son 1–2 il üzrə təqdim oluna bilər. Mövcud olmayan və ya ayrıca toplanmayan məlumatların bu mərhələdə sıfırdan hazırlanmasına ehtiyac yoxdur.

Sizə I MƏRHƏLƏ  ilə bağlı hazır cədvəl göndərirəm, siz sadəcə cədvəli doldurub geri göndərməlisiniz.

İlk mərhələdə qeyd olunan məlumatları ən qısa zamanda mənə göndərməyinizi xahiş edirəm.

Hörmətlə Elşən Qafarov

II MƏRHƏLƏ ( DİQQƏT ! Bu mərhələnin məlumatları cari tədris ilini əhatə edir ). Məktəb mühiti, risklər və tədris prosesinin keyfiyyəti

Bu mərhələ ilkin rəqəmlərin arxasında duran səbəbləri aydınlaşdırmaq üçün tələb olunur. Burada davamiyyət, intizam, risk qrupları, psixoloji xidmət, valideynlərlə iş və metodiki müşahidələr əsas yer tutur.

Salam hörmətli  _________________ müəllim.

Məktəbin İnkişaf Planının hazırlanmasının ikinci mərhələsində aşağıda qeyd olunan məlumatların mənə göndərilməsini xahiş edirəm. Bu mərhələdə əsas məqsəd məktəbdə tədris nəticələrinin arxasında duran səbəbləri, məktəb mühitini, risk sahələrini, metodiki vəziyyəti və dəstək ehtiyaclarını daha aydın görməkdir. Məlumatların mümkün qədər sadə cədvəl və ya qısa arayış formasında təqdim olunması kifayətdir. Məktəbdə bu sahələr üzrə mövcud sənədlər və qeydlər varsa, həmin materiallar əsasında ümumiləşdirilmiş şəkildə göndərilə bilər. Hər bənd üzrə ayrıca yeni və geniş sənəd hazırlamağa ehtiyac yoxdur.

16. Aylıq davamiyyət cədvəli
Sentyabr–iyun ayları üzrə siniflər üzrə davamiyyət və ya davamiyyətsizlik göstəriciləri təqdim olunsun.
Bu məlumatı sadə cədvəl şəklində vermək kifayətdir. Hər sinif ayrıca göstərilsin. Məktəbdə jurnal və ya elektron sistemdə olan məlumatlar əsasında ümumiləşdirilmiş şəkildə hazırlanması uyğundur.

17. Dərsə gecikmə göstəriciləri
Birinci dərs saatına gecikmə halları aylar və siniflər üzrə təqdim olunsun.
Bu məlumatı aylıq cədvəl şəklində vermək kifayətdir. Hər sinif üzrə gecikmə sayı ayrıca göstərilsin. İmkan varsa ay üzrə ümumi yekun da əlavə oluna bilər.

18. Ardıcıl dərs buraxma halları üzrə məlumat
Aylar üzrə ardıcıl dərs buraxan şagirdlərlə bağlı ümumi məlumat təqdim olunsun.
Bu məlumatı qısa cədvəl və ya qısa arayış şəklində vermək kifayətdir. Adların geniş siyahısını yazmağa ehtiyac yoxdur. Siniflər üzrə ümumi say göstərilsə yetərlidir.

19. Davranış pozuntuları barədə məlumat
Aylar üzrə ümumi say və əsas növlər üzrə bölgü təqdim olunsun.
Məsələn, sinifdaxili münaqişə, qayda pozuntusu, dərs prosesinə mane olan davranış və digər uyğun başlıqlar üzrə ümumiləşdirmək olar. Məlumatı sadə aylıq cədvəl şəklində vermək kifayətdir. Məktəbdə aparılan qeydlər əsasında hazırlanması uyğundur.

20. Növbətçilik və nəzarət qeydlərinin qısa xülasəsi
Aylar üzrə əsas müşahidə olunan hallar qısa şəkildə təqdim olunsun.
Bu məlumatı qısa arayış formasında vermək kifayətdir. Burada geniş izaha ehtiyac yoxdur. Hər ay üzrə diqqət çəkən 2–3 halın qeyd olunması yetərlidir.

21. Risk qrupları üzrə ümumi cədvəl
Akademik risk, davamiyyət və gecikmə riski, davranış riski, sosial risk, psixoloji risk, sağlamlıqla bağlı risk üzrə ümumi saylar təqdim olunsun.
Bu məlumat ad göstərilmədən yalnız sayla verilsin. Hər risk istiqaməti ayrıca sətirdə göstərilsin. İmkan varsa siniflər üzrə bölgü də əlavə edilə bilər.

Akademik risk üzrə ardıcıl zəif nəticə göstərən, əsas fənlər üzrə ciddi boşluğu olan, illik nəticələrində problem görünən, yay tapşırığı alan və ya monitorinq nəticələri zəif olan şagirdlər nəzərə alına bilər.
Davamiyyət və gecikmə riski üzrə dərsə müntəzəm gəlməyən, ardıcıl dərs buraxan və birinci saatlara tez-tez gecikən şagirdlər nəzərə alına bilər.
Davranış riski üzrə məktəbdaxili qayda pozuntusu təkrar olunan, sinifdaxili münasibətlərdə çətinlik yaradan və nəzarət qeydlərində adı tez-tez görünən şagirdlər nəzərə alına bilər.
Sosial risk üzrə ailə vəziyyəti, nəzarət zəifliyi, sosial çətinlik və buna bənzər səbəblərlə əlavə diqqət tələb edən şagirdlər nəzərə alına bilər.
Psixoloji risk üzrə emosional gərginlik, özünəqapanma, aqressivlik, münasibət çətinliyi və ya psixoloji dəstəyə ehtiyac görünən şagirdlər nəzərə alına bilər.
Sağlamlıqla bağlı risk üzrə sağlamlıq vəziyyəti səbəbindən tədrisdə əlavə dəstək və ya uyğunlaşdırma tələb edən şagirdlər nəzərə alına bilər.

22. Risk qrupunda olan şagirdlərin sayında dəyişiklik
Aylar və ya yarımillər üzrə risk qrupuna daxil olan və risk qrupundan çıxan şagirdlərin sayı təqdim olunsun.
Bu məlumatı sadə cədvəl şəklində vermək kifayətdir. Hər risk istiqaməti ayrıca göstərilsə daha yaxşı olar. Adların tam siyahısını yazmağa ehtiyac yoxdur.

23. Sağlamlıq məhdudiyyəti olan şagirdlər barədə ümumi məlumat
Ad göstərilmədən yalnız ümumi say təqdim olunsun.
Əgər siniflər üzrə bölgü hazırdırsa, onu da əlavə etmək olar. Bu məlumatı kiçik cədvəl və ya qısa arayış formasında vermək kifayətdir.

24. Fərdi Tədris Planı tətbiq olunan şagirdlər barədə məlumat
Varsa ümumi say təqdim olunsun.
Adların göstərilməsi vacib deyil. Siniflər üzrə bölgü varsa, əlavə edilə bilər. Qısa cədvəl kifayətdir.

25. Dərs müşahidəsi planı
Aylar üzrə neçə dərs müşahidəsi aparıldığı və əsas diqqət istiqamətləri təqdim olunsun.
Burada söhbət dərsdinləmədən yox, dərs müşahidəsindən gedir. Yəni məqsəd müəllimin danışığını dinləmək yox, dərsin bütöv gedişini izləməkdir. Dərsdə məqsədin necə qurulduğu, şagird fəallığı, tapşırıqların səviyyəsi, qiymətləndirmə, fərqli səviyyəli şagirdlərlə iş, sinif idarəetməsi, vaxt bölgüsü və dərsin yekunu kimi məqamlar nəzərdə tutulur. Bu məlumatı sadə cədvəl formasında vermək kifayətdir. Hər ay üzrə müşahidə sayı və əsas fokus istiqamətləri qısa yazılsın.

26. Dərs müşahidələrinin ümumi cədvəli
Aylar üzrə müşahidə sayı və əsas metodiki çətinliklərin qısa xülasəsi təqdim olunsun.
Burada hər müşahidənin tam mətni tələb olunmur. Aylar üzrə ümumiləşdirilmiş mənzərə kifayətdir. Məsələn, şagird fəallığının zəifliyi, qiymətləndirmədə qeyri-dəqiqlik, vaxtın düzgün bölünməməsi, diferensial yanaşmanın zəifliyi kimi məqamlar qısa qeyd oluna bilər.

27. Minimum 3–5 dərs müşahidə arayışı
Məktəbdə mövcud olan 3–5 nümunə dərs müşahidə arayışı təqdim olunsun.
Hər arayışda dərsin qısa ümumi mənzərəsi, güclü tərəflər, inkişaf tələb edən məqamlar, müəllimə verilmiş tapşırıqlar və həmin tapşırıqlarla bağlı sonrakı izləmə qeydi göstərilsin. Burada da söhbət dərsdinləmə arayışından yox, dərs müşahidəsi arayışından gedir. Hazır arayışlar varsa, olduğu kimi göndərilə bilər. Yoxdursa, qısa formada hazırlanması kifayətdir.

28. Metodbirləşmə iclaslarının xülasəsi
İclas sayı, müzakirə olunan əsas məsələlər və nəticə kimi ortaya çıxan işlər təqdim olunsun.
Bu məlumatı qısa arayış və ya cədvəl formasında vermək kifayətdir. Hər iclasın tam protokolunu göndərmək vacib deyil. Əsas məsələlər və görülmüş işlər qısa şəkildə qeyd olunsun.

29. Psixoloqun yarımillik ümumi xülasəsi
I yarımil və II yarımil üzrə qısa ümumiləşdirilmiş məlumat təqdim olunsun.
Burada müraciət sayı, fərdi və qrup işi, əsas gərginlik nöqtələri və məktəbdə görünən ümumi ehtiyaclar qeyd olunsun. Fərdi məlumatların geniş yazılmasına ehtiyac yoxdur. Qısa arayış kifayətdir.

30. Valideynlərlə iş göstəriciləri
Risk halları üzrə əlaqə və görüş sayı, iştirak səviyyəsi və ümumi vəziyyət təqdim olunsun.
Bu məlumatı qısa cədvəl və ya arayış formasında vermək kifayətdir. Məsələn, neçə görüş keçirilib, neçə valideynlə əlaqə saxlanılıb, iştirak səviyyəsi nə olub. Geniş izah tələb olunmur.

31. Valideyn sorğusunun nəticələri
Əsas sahələr üzrə ümumi nəticələr, ən zəif və ən güclü istiqamətlər təqdim olunsun.
Əgər məktəbdə valideyn sorğusu aparılıbsa, nəticələri ümumiləşdirilmiş şəkildə vermək kifayətdir. Sorğu blanklarını ayrıca göndərməyə ehtiyac yoxdur. Qısa yekun və ümumi nəticələr yetərlidir.

32. Şagird sorğusunun nəticələri
Məktəb mühiti, təhlükəsizlik, münasibətlər və varsa bullinq riski ilə bağlı ümumi mənzərə təqdim olunsun.
Bu məlumatı qısa cədvəl və ya arayış formasında vermək kifayətdir. Sorğuda təhlükəsizlik hissi, müəllimlə münasibət, sinif yoldaşları ilə münasibət, dəstək mühiti və narahatlıq yaradan hallar kimi istiqamətlər ümumiləşdirilə bilər. Ən zəif görünən 2–3 sahənin ayrıca qeyd olunması faydalı olar.

Qeyd: İkinci mərhələ üzrə məlumatlar əsasən cari tədris ilinin vəziyyətini əks etdirməlidir. Bu mərhələdə məqsəd məktəbin hazırkı davamiyyət, gecikmə, ardıcıl dərs buraxma halları, davranış vəziyyəti, risk qrupları, dərs müşahidəsi, psixoloji xidmət və valideynlərlə iş sahəsində mövcud mənzərəni aydın görməkdir. Buna görə 16–30-cu bəndlər üzrə məlumatların cari tədris ili üzrə təqdim olunması kifayətdir. 31-ci və 32-ci bəndlər üzrə, yəni valideyn və şagird sorğularında əvvəlki ilin nəticələri də mövcuddursa, onların qısa müqayisəli şəkildə təqdim edilməsi faydalı ola bilər. Lakin belə məlumatlar yoxdursa, yalnız cari tədris ilinin nəticələrinin verilməsi də kifayətdir.

Sizə II MƏRHƏLƏ  ilə bağlı hazır cədvəl göndərirəm, siz sadəcə cədvəli doldurub geri göndərməlisiniz.

II mərhələdə qeyd olunan məlumatları ən qısa zamanda mənə göndərməyinizi xahiş edirəm.

III MƏRHƏLƏ. Kadr, resurs, təhlükəsizlik və idarəetmə sənədləri

Bu mərhələ MİP-in icra imkanlarını, resurs bazasını və hüquqi rəsmiləşdirmə hissəsini formalaşdırmaq üçün tələb olunur.

Salam hörmətli ____________ müəllim.

Məktəbin İnkişaf Planının hazırlanmasının üçüncü mərhələsində aşağıda qeyd olunan məlumatların mənə göndərilməsini xahiş edirəm. Bu mərhələdə məqsəd məktəbin kadr imkanlarını, resurs vəziyyətini, təhlükəsizlik şəraitini və MİP-in icrası üçün lazım olan təşkilati əsasları aydın görməkdir. Məlumatların sadə cədvəl və ya qısa arayış formasında təqdim olunması kifayətdir. Məktəbdə bu sahələrlə bağlı hazır sənəd və cədvəllər varsa, həmin materiallar əsasında ümumiləşdirilmiş şəkildə göndərilə bilər. Hər bənd üzrə ayrıca yeni və geniş sənəd hazırlamağa ehtiyac yoxdur.

33. Pedaqoji heyət barədə ümumi məlumat
Müəllimlərin ümumi sayı, fənlər üzrə bölgü, ixtisas uyğunluğu və sertifikasiya ilə bağlı ümumi vəziyyət barədə qısa məlumat təqdim olunsun.
Bu məlumatı sadə cədvəl şəklində vermək kifayətdir. Hər fənn üzrə neçə müəllim olduğu göstərilsin. İxtisas uyğunluğu barədə ümumi vəziyyət qısa qeyd olunsun. Sertifikasiya ilə bağlı isə məktəbdə bu prosesdə iştirak etmiş müəllimlərin ümumi sayı, fənlər üzrə ümumi mənzərə və iştirak etməyən müəllimlərlə bağlı ümumi vəziyyət qeyd oluna bilər. Ayrı-ayrı şəxslər üzrə geniş izaha ehtiyac yoxdur.

34. Dərs bölgüsü və dərs yükü barədə məlumat
Əsas fənlər üzrə dərs yükü və ümumi bölgü vəziyyəti təqdim olunsun.
Bu məlumatı qısa cədvəl şəklində vermək kifayətdir. Hər əsas fənn üzrə ümumi saat yükü və müəllimlər arasında bölgü göstərilsin. Əgər dərs bölgüsündə il ərzində dəyişiklik olubsa, bu barədə qısa qeyd əlavə edilə bilər.

35. Buraxılan və əvəz olunan dərslər üzrə statistika
Aylar üzrə buraxılan dərslərin və əvəz olunan dərslərin sayı təqdim olunsun.
Bu məlumatı sadə aylıq cədvəl şəklində vermək kifayətdir. Hər ay üzrə neçə dərsin buraxıldığı və neçə dərsin əvəz olunduğu ayrıca göstərilsin. İmkan varsa əsas səbəblər barədə qısa qeyd də əlavə edilə bilər. Məqsəd dərs prosesində sabitlik vəziyyətini görməkdir.

36. Müəllimlərin peşəkar inkişaf ehtiyacları
Müşahidələrdən, metodiki işdən, tədris nəticələrindən və sertifikasiya ilə bağlı ümumi mənzərədən görünən əsas peşəkar inkişaf ehtiyacları təqdim olunsun.
Bu məlumatı qısa siyahı və ya cədvəl formasında vermək kifayətdir. Məsələn, qiymətləndirmə, sinif idarəetməsi, diferensial yanaşma, dərsin planlaşdırılması, şagird fəallığının artırılması, zəif nəticələrlə iş və sertifikasiya hazırlığı kimi istiqamətlər qeyd oluna bilər. Məqsəd məktəbdə hansı sahələr üzrə metodiki və peşəkar dəstəyə daha çox ehtiyac olduğunu aydın görməkdir.

37. Yeni müəllimlər və adaptasiya ehtiyacı
Varsa yeni müəllimlərin ümumi sayı və onların uyğunlaşma ilə bağlı əsas ehtiyacları barədə qısa məlumat təqdim olunsun.
Bu məlumatı qısa arayış və ya kiçik cədvəl şəklində vermək kifayətdir. Məktəbə yeni gələn müəllimlər üçün mentorluq, metodiki dəstək, sənədləşmə ilə tanışlıq və məktəb mühitinə uyğunlaşma ehtiyacı varsa, qısa şəkildə qeyd oluna bilər.

38. Maddi-texniki inventar barədə ümumi cədvəl
Sinif otaqları, kompüter və noutbuklar, printer, proyektor, internet təminatı və digər əsas resurslar barədə ümumi məlumat təqdim olunsun.
Bu məlumatı sadə cədvəl şəklində vermək kifayətdir. Mövcud resursların sayı və işlək vəziyyətdə olub-olmaması qısa şəkildə göstərilsin. Çox detallı inventar siyahısına ehtiyac yoxdur.

39. Məktəbin əsas ehtiyac duyduğu resurslar
Məktəbin yaxın dövrdə daha çox ehtiyac duyduğu resurslar və sonrakı dövr üçün vacib görünən əsas ehtiyaclar təqdim olunsun.
Bu məlumatı qısa siyahı şəklində vermək kifayətdir. Birinci hissədə daha təcili lazım olan resurslar, ikinci hissədə isə sonrakı dövr üçün nəzərdə tutulan əsas ehtiyaclar qeyd olunsun. Ən vacib ehtiyacların yazılması kifayətdir.

40. İnternet və İKT ilə bağlı nasazlıqlar barədə məlumat
Varsa aylıq və ya ümumi göstərici təqdim olunsun.
Bu məlumatı qısa cədvəl və ya qısa arayış şəklində vermək kifayətdir. İnternet kəsintisi, zəif bağlantı, işləməyən kompüter, printer və digər İKT problemləri qısa şəkildə qeyd oluna bilər.

41. Çap və surətçıxarma ehtiyacı barədə məlumat
Aylıq minimum ehtiyac və faktiki imkan təqdim olunsun.
Bu məlumatı sadə cədvəl şəklində vermək kifayətdir. Təxmini aylıq ehtiyac və mövcud imkan qısa göstərilsin. Məqsəd gündəlik işdə bu sahədə çatışmazlıq olub-olmadığını görməkdir.

42. Yanğın təhlükəsizliyi və təxliyə ilə bağlı qısa xülasə
Mövcud sənədlər, keçirilmiş tədbirlər və ümumi vəziyyət barədə qısa məlumat təqdim olunsun.
Bu məlumatı qısa arayış formasında vermək kifayətdir. Məktəbdə yanğın planının olub-olmaması, təxliyə məşqinin keçirilib-keçirilməməsi və ümumi hazırlıq vəziyyəti qısa qeyd olunsun.

43. Sanitariya-gigiyena vəziyyəti barədə xülasə
Mövcud yoxlama və müşahidələrə əsasən ümumi məlumat təqdim olunsun.
Bu məlumatı qısa arayış formasında vermək kifayətdir. Təmizlik vəziyyəti, sanitar qovşaqlar, içməli su, sinif otaqlarının gigiyenik durumu və ümumi müşahidə olunan vəziyyət qısa qeyd oluna bilər.

44. Mühafizə və növbətçilik təşkili barədə məlumat
Növbə sayı, əhatə olunan sahələr və ümumi təşkilati vəziyyət təqdim olunsun.
Bu məlumatı qısa arayış və ya cədvəl şəklində vermək kifayətdir. Məktəbdə mühafizə və növbətçiliyin necə təşkil olunduğu, hansı sahələri əhatə etdiyi və ümumi vəziyyət qısa göstərilsin.

45. Riskli zonalar üzrə qısa siyahı
Məktəbin ərazisində və binasında diqqət tələb edən risk sahələri təqdim olunsun.
Bu məlumatı qısa siyahı və ya cədvəl şəklində vermək kifayətdir. Məsələn, həyət, pilləkən, giriş-çıxış hissəsi, sanitar qovşaq, idman sahəsi və buna bənzər yerlər qeyd oluna bilər. Hər sahə üzrə qısa risk qeydi yazılması faydalı olar.

46. MİP işçi qrupunun tərkibi üçün məlumat
İşçi qrupuna daxil ediləcək şəxslər və onların vəzifələri təqdim olunsun.
Bu məlumatı sadə cədvəl şəklində vermək kifayətdir. Şəxsin adı, vəzifəsi və işçi qrupunda hansı istiqamət üzrə məsul olacağı göstərilsin.

47. MİP-in qəbulu və təsdiqi üçün hüquqi əsaslar
Pedaqoji Şura qərarı və direktor əmri üçün əsas məlumatlar təqdim olunsun.
Bu məlumatı qısa arayış şəklində vermək kifayətdir. MİP-in məktəbdə hansı qaydada müzakirə ediləcəyi və təsdiqlənəcəyi barədə əsas məlumatlar göstərilsin. Hazır layihə sənədləri varsa, sonradan onların da işlənməsi mümkündür.

48. Aylıq monitorinq və hesabat forması
Məktəbdə istifadə olunan və ya istifadə oluna bilən aylıq izləmə forması varsa, təqdim olunsun.
Hazır forma varsa, olduğu kimi göndərilə bilər. Yoxdursa, aylıq izləmə zamanı hansı məlumatların qeyd olunduğu barədə qısa qeyd də kifayətdir. Məqsəd MİP üzrə görülən işlərin sonradan necə izlənəcəyini əvvəlcədən görməkdir.

49. Risk olan siniflər və əsas zəif bacarıqlar üzrə qısa cədvəl
Məktəbdə hansı siniflərdə risk daha çox görünürsə və həmin siniflərdə hansı əsas zəif bacarıqlar müşahidə olunursa, qısa şəkildə təqdim olunsun.
Bu məlumatı sadə cədvəl şəklində vermək kifayətdir. Məsələn, sinifin adı, əsas zəif fənn və ya bacarıq sahəsi və qısa qeyd göstərilə bilər. Əgər məktəbdə ayrıca belə təhlil aparılmayıbsa, mövcud müşahidələr əsasında qısa qeyd yazılması da kifayətdir.

50. Görülən işlərin izlənməsi üçün istifadə olunan cədvəl və ya forma
Məktəbdə görülən işlərin qeyd olunması və izlənməsi üçün istifadə olunan hazır cədvəl və ya forma varsa, təqdim olunsun.
Hazır forma varsa, olduğu kimi göndərilə bilər. Yoxdursa, görülən işlərin necə qeyd edildiyi və izlənildiyi barədə qısa məlumat da kifayətdir. Məqsəd sonradan MİP-in icrasını rahat izləmək üçün uyğun formanın seçilməsidir.

Qeyd: Üçüncü mərhələ üzrə məlumatlar əsasən məktəbin hazırkı vəziyyətini əks etdirməlidir. Mövcud sənədlər və hazır cədvəllər varsa, həmin materialların ümumiləşdirilmiş şəkildə təqdim olunması kifayətdir. Əlavə olaraq yeni və geniş həcmli sənədlərin hazırlanmasına ehtiyac yoxdur.

  Sizə III MƏRHƏLƏ  ilə bağlı hazır cədvəl göndərirəm, siz sadəcə cədvəli doldurub geri göndərməlisiniz.

Hörmətlə Elşən Qafarov

QEYD: Məlumatların mərhələli təqdim olunması məqsədəuyğundur. İlk növbədə I mərhələ üzrə məlumatlar, daha sonra II mərhələ, sonda isə III mərhələ üzrə məlumatlar təqdim edilə bilər.