İdman Akademiyasında dissertasiya işinin müzakirəsi aparılıb

Azərbaycan İdman Akademiyasında dissertasiya işinin ilkin müzakirəsi aparılıb.

Direktor.az xəbər verir ki, Azərbaycan İdman Akademiyasında elmi dərəcə iddiaçısının tədqiqat işi müzakirəyə çıxarılıb. İclas Fiziki tərbiyə fakültəsinin iki kafedrasının — Fiziki hazırlıq ilə Humanitar fənlər kafedralarının birgə təşkilatçılığı əsasında təşkil olunub. Tədbirə Humanitar fənlər kafedrasının rəhbəri, pedaqogika üzrə fəlsəfə doktoru Qəmər İsayeva sədrlik edib.

İclasda akademiyanın qiyabi əsaslarla təhsil alan doktorantı Zülfiyyə Yolçiyevanın fəlsəfə doktoru elmi dərəcəsi almaq məqsədilə hazırladığı tədqiqat işi nəzərdən keçirilib. İddiaçı “Fiziki tərbiyənin, idman təliminin nəzəriyyəsi və metodikası” (5806.01) ixtisası çərçivəsində pedaqogika elmləri üzrə “Fiziki tərbiyə dərslərində yeniyetmələrin fiziki bacarıqları ilə əqli bacarıqlarının vəhdətdə inkişaf etdirilməsi təlim nəticələrinin yüksəldilməsi yolu kimi” mövzusunda çıxış edib. Çıxış zamanı araşdırmanın qarşıya qoyduğu əsas məqsəd və hədəflər, elmi baxımdan gətirdiyi yeniliklər, həmçinin nəzəri-praktiki dəyəri və əldə olunmuş son nəticələr təqdim edilib.

Hər iki kafedranın professor-müəllim heyətinin qatıldığı müzakirədə tədqiqat ətrafında geniş fikir mübadiləsi aparılıb, mütəxəssislər işin məzmununa dair rəy, qeyd və təkliflərini bölüşüblər.

Toplantının yekununda dissertasiya işinin müdafiə prosesinin növbəti mərhələsinə buraxılması üçün müvafiq istiqamətlər və tövsiyələr verilib.