Məktəb liderliyi – 10. Ədalətli, etik və nümunəvi davranmaq

Məktəb liderliyi yalnız səlahiyyətə malik olmaq, qərar qəbul etmək və tapşırıq verməklə məhdudlaşmır. Məktəb liderinin şəxsi davranışı, insanlara münasibəti və gündəlik seçimləri məktəbin ümumi mədəniyyətinə birbaşa təsir göstərir. Rəhbər kollektivdən tələb etdiyi davranışı ilk növbədə özü nümayiş etdirməlidir. Dəqiqlik tələb edən rəhbər özü işə, görüşlərə və məktəbdaxili tədbirlərə vaxtında gəlməlidir. Hesabatlılıq tələb edən rəhbər öz qərarlarının nəticələri barədə də hesabat verməyə hazır olmalıdır. Hörmət gözləyən rəhbər müəllim, şagird, valideyn və digər əməkdaşlarla hörmətlə danışmalıdır. Rəhbərin sözü ilə əməli uyğun olduqda kollektivdə ona qarşı etimad yaranır. Verdiyi sözə əməl etməyən və özü pozduğu qaydanı başqalarına tətbiq edən rəhbər mənəvi nüfuzunu zəiflədir. Etik liderlik yalnız nəzakətli davranmaq deyil, bütün qərarları qanunçuluq, ədalət, dürüstlük və insan ləyaqəti əsasında qəbul etməkdir. Məktəb rəhbəri ona verilmiş səlahiyyəti şəxsi üstünlük vasitəsi deyil, məktəbin məqsədlərinə xidmət edən məsuliyyət kimi qəbul etməlidir.