Milli fotomüsabiqənin vaxtı uzadıldı - Elm və Təhsil Nazirliyi

Məktəblilər üçün keçirilən “FotoBax” fotomüsabiqəsinin vaxtı uzadılıb.

Direktor.az xəbər verir ki, bu barədə Elm və Təhsil Nazirliyi məlumat yayıb.

Məktəblilər və yeniyetmələr üçün nəzərdə tutulan “FotoBax” milli fotomüsabiqəsində iştirak etmək istəyənlər üçün qeydiyyat müddəti 11 oktyabr tarixinədək uzadılıb. 

Layihə Heydər Əliyev Fondunun vitse-prezidenti və IDEA İctimai Birliyinin rəhbəri Leyla Əliyevanın himayəsi, tanınmış beynəlxalq fotoqraf, “Reza Visual Academy”nin rəhbəri Reza Deqatinin təşəbbüsü ilə təşkil olunur.

Təşəbbüsün təməl qayəsi gənc nəsildə ətraf mühitə həssas yanaşma formalaşdırmaq, ölkə təbiətinin zənginliyini onların gözü ilə nümayiş etdirmək və yaradıcı potensiallarını fotoqrafiya sənəti ilə ifadə etmələrinə imkan yaratmaqdır.

Müsabiqə ilə bağlı əsas şərtlər:

Kimlər qatıla bilər: 18 yaşınadək olan bütün məktəbli və yeniyetmələr.

Foto limiti: Hər iştirakçı 20-dək orijinal fotoşəkil təqdim edə bilər.

Müraciət qaydası: Qeydiyyat və işlərin qəbulu oktyabrın 11-dək www.fotobax.az rəsmi internet səhifəsi üzərindən aparılır.