Müəllimlər üçün geyim qaydalarını və tələbləri müəyyən edildi

“Dövlət ümumi təhsil müəssisələrində təhsilverənlər üçün geyim ilə bağlı Tələblər’in” təsdiq edilməsi haqqında Azərbaycan Respublikasının Nazirlər Kabineti qərar qəbul edib.

Direktor.az xəbər verir ki, sənəd dövlət ümumi təhsil müəssisələrində işgüzar geyim mədəniyyətinin formalaşdırılmasına və vahid yanaşmanın təmin edilməsinə yönəlib.

TƏLƏBLƏR

1 . Ümumi müddəalar

1.1. Dövlət ümumi təhsil müəssisəsində təhsilverənlər üçün geyim ilə bağlı Tələblər

(bundan sonra – Tələblər) “Ümumi təhsil haqqında” Azərbaycan Respublikası Qanununun

12.13-cü maddəsinin ikinci cümləsinə uyğun olaraq hazırlanmışdır və dövlət ümumi təhsil

müəssisələrində (bundan sonra – məktəb) təhsilverənlər (bundan sonra – təhsilverənlər)

üçün geyim ilə bağlı vahid qaydaları müəyyən edir.

1.2. Bu Tələblər xüsusi təyinatlı dövlət ümumi təhsil müəssisələrinin təhsilverənlərinə

şamil edilmir.

1.3. Bu Tələblərin məqsədi təhsilverənlərin geyimi ilə bağlı vahid yanaşmanın

müəyyənləşdirilməsi, məktəbdə işgüzar geyim mədəniyyətinin formalaşdırılmasıdır.

1.4. Təhsilverənlər əmək funksiyalarını yerinə yetirdikləri müddətdə məktəbdə, habelə

məktəbi təmsil etdikləri məktəbdənkənar rəsmi və təntənəli tədbirlərdə bu Tələblərə riayət

etməlidirlər.

1.5. Azərbaycan xalqının tarixi, mədəniyyəti və milli-mənəvi dəyərləri ilə bağlı keçirilən

tədbirlərdə məktəbin Pedaqoji Şurasının qərarı ilə milli geyimlərdən və ya milli geyim

elementlərindən istifadə edilməsinə yol verilir.

1.6. Təhsilverənlərin geyimi, o cümlədən istifadə etdikləri geyim elementləri ümumi

təhsilin dünyəvilik prinsipinə uyğun olmalıdır.

1.7. Bu Tələblərə təhsilverənlər tərəfindən riayət edilməsinə məktəbin rəhbərliyi

nəzarət edir.

1.8. Bu Tələblərə təhsilverənlər tərəfindən riayət olunması ilə bağlı məsələlər məktəbin

Pedaqoji Şurası tərəfindən həll edilir.

1. Təhsilverənlərin geyiminə dair ümumi tələblər

2.1. Təhsilverənlərin geyimi mövsümə uyğun təmiz, səliqəli, sadə və işgüzar üslubda

(fiziki tərbiyə, çağırışaqədərki hazırlıq, texnologiya, fizika, kimya və biologiya fənlərinin tədrisi

zamanı tədris məşğələsinin xarakterinə və iş şəraitinə uyğun funksional və rahat

geyimlərdən istifadə edilməsi istisna olmaqla) olmalıdır.

2.2. Bu Tələblərin 2.1-ci bəndi nəzərə alınmaqla təhsilverənlər üçün aşağıdakı geyimlər

müəyyən edilir:

2.2.1. kişi təhsilverənlər üçün:

2.2.1.1. sərbəst kəsimli klassik üslublu dəst (pencək və şalvar);

2.2.1.2. uzunqol və ya qısaqol birrəngli, yaxud zolaqlı, dama-dama və ya xırda naxışlı

klassik köynək;

2.2.1.3. təhsilverənin öz istəyi ilə qalstuk, habelə köynəyin üzərindən geyinilən klassik

üslubda sviter, pulover və ya jilet;

2.2.1.4. klassik ayaqqabı.

2.2.2. qadın təhsilverənlər üçün:

2.2.2.1. sərbəst kəsimli klassik üslublu dəst (pencək və şalvar, pencək və ətək və ya

pencək və don);

2.2.2.2. uzunluğu diz xəttində və ya dizdən aşağı olan ətək və ya don;

2.2.2.3. uzunqol və ya qısaqol birrəngli, yaxud zolaqlı, dama-dama və ya xırda naxışlı

klassik köynək və ya kofta;

2.2.2.4. klassik ayaqqabı.

2.3. Geyimin ölçüsü və forması təhsilverənin əmək funksiyasının icrasına mane

olmamalıdır.

2.4. Təhsilverənlərin əmək funksiyalarını yerinə yetirdikləri müddətdə məktəbin işgüzar

mühitinə, pedaqoji fəaliyyətin xarakterinə və təhsilalanların yaş xüsusiyyətlərinə uyğun

olmayan, həmçinin bu Tələblərlə müəyyən edilmiş geyim üslubundan kənara çıxan geyimlərdən (geyim elementlərindən) istifadə etməsinə yol verilmir.